കൊച്ചി: ദൃശ്യം സിനിമ ആമസോണ്‍ പ്രൈമില്‍ റിലീസ് ചെയ്യാന്‍ തീരുമാനിച്ചതോടെ മോഹന്‍ലാലിനെതിരെ ഫിലിം ചേംബര്‍. തിയേറ്റര്‍ ഉടമകള്‍ക്ക് 2021 വഞ്ചനയുടെ വര്‍ഷമായി കണക്കാക്കാമെന്ന് ഫിലിം ചേംബര്‍ പ്രസിഡന്റ് അനില്‍തോമസ് ഫെയ്‌സ്ബുക്ക് പോസ്റ്റില്‍ കുറിച്ചു.
കോവിഡ് പ്രതിസന്ധി തുടരുന്ന സാഹചര്യത്തില്‍ തിയേറ്ററുകള്‍ ഉടന്‍ തുറക്കാന്‍ സാധ്യതയില്ലെന്ന് കണ്ടാണ് സിനിമ ഓണ്‍ലൈനായി റിലീസ് ചെയ്യാന്‍ തീരുമാനിച്ചത്. “ജനുവരിയില്‍ തിയേറ്ററില്‍ സിനിമ ചെയ്യാനാണ് ഉദ്ദേശിച്ചത്. എന്നാല്‍ മറ്റ് രാജ്യങ്ങളില്‍ കോവിഡ് പ്രതിസന്ധിയില്‍ കുറവില്ല. മാര്‍ച്ചില്‍ മരക്കാര്‍ റിലീസ് ചെയ്യുന്നതിനാല്‍ വീണ്ടും സിനിമയുടെ റിലീസ് നീട്ടികൊണ്ടുപോകാനാകില്ല. കൂടാതെ, ദൃശ്യം തിയേറ്ററില്‍ വന്നാല്‍ മൂന്നോ നാലോ ദിവസത്തിനുള്ളില്‍ പൈറേറ്റഡ് കോപ്പി പുറത്തിറങ്ങും. അതിനേക്കാള്‍ നല്ലത് ഓണ്‍ലൈനില്‍ റിലീസ് ചെയ്യുന്നതാണ്. ഡിസംബറിലാണ് ഇക്കാര്യത്തില്‍ അന്തിമതീരുമാനം ഉണ്ടായത്.”-സംവിധായകന്‍ ജീത്തു ജോസഫ് പറഞ്ഞു.
മീന, സിദ്ദിഖ്, ആശ ശരത്, മുരളി ഗോപി, അന്‍സിബ, എസ്തര്‍, സായികുമാര്‍ എന്നിവര്‍ പ്രധാന വേഷങ്ങളില്‍ എത്തുന്നു. ആശീര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് ദൃശ്യം 2 നിര്‍മിച്ചിരിക്കുന്നത്.
