പാലക്കാട്: പൊതുമേഖലയിലെ രാജ്യത്തെ ആദ്യ ഡിഫന്‍സ് പാര്‍ക്ക് പാലക്കാട് ഒറ്റപ്പാലത്ത് ഒരുങ്ങി. 130.94 കോടി ചെലവില്‍ കിന്‍ഫ്രയുടെ 60 ഏക്കറിലാണ് പാര്‍ക്ക് തയ്യാറാക്കിയിരിക്കുന്നത്. 50 കോടിയുടെ കേന്ദ്രസഹായവും പദ്ധതിക്കുണ്ട്. പ്രതിരോധ ഉപകരണങ്ങള്‍ നിര്‍മിക്കുന്ന വിവിധ യൂണിറ്റുകളെ ഒരു കുടക്കീഴില്‍ കൊണ്ടുവരാന്‍ ഡിഫന്‍സ് പാര്‍ക്കിന് സാധിക്കും.
ആത്മനിര്‍ഭര്‍ ഭാരത് പദ്ധതിയുടെ ഭാഗമായി 101 പ്രതിരോധ ഉല്പന്നങ്ങളുടെ ഇറക്കുമതി നിരോധിക്കാന്‍ കേന്ദ്രസര്‍ക്കാര്‍ തീരുമാനിച്ച സാഹചര്യത്തില്‍ ഒറ്റപ്പാലം പ്രതിരോധ പാര്‍ക്ക് രാജ്യത്തെ ശ്രദ്ധാ കേന്ദ്രമാകും. അടിസ്ഥാന സൗകര്യങ്ങളോടെയുള്ള കെട്ടിടങ്ങള്‍(സ്റ്റാന്‍ഡേര്‍ഡ് ഡിസൈന്‍ ഫാക്ടറി) വെയര്‍ ഹൗസുകള്‍, കോമണ്‍ യൂട്ടിലിറ്റി സെന്റര്‍ തുടങ്ങിയ സൗകര്യങ്ങളാണ് പ്രതിരോധ പാര്‍ക്കില്‍ സജ്ജമാക്കിയിട്ടുള്ളത്. പാര്‍ക്ക് പ്രവര്‍ത്തനം തുടങ്ങുന്നതോടെ പ്രതിരോധ വ്യവസായ രംഗത്ത് കേരളത്തിന് വലിയ സാധ്യത കൈവരും.
