തിരുവനന്തപുരം: കേരളത്തില്‍ ഓടിക്കൊണ്ടിരിക്കുന്ന തീവണ്ടികള്‍ നിര്‍ത്തലാക്കാനുള്ള കേന്ദ്രസര്‍ക്കാര്‍ തീരുമാനത്തിനെതിരെ സിപിഐ സംസ്ഥാന സെക്രട്ടറി കാനം രാജേന്ദ്രന്‍. കോവിഡിന്റെ മറവില്‍ സ്വകാര്യവല്‍ക്കരണം വ്യാപകമാക്കാനുള്ള നീക്കത്തിന്റെ ഭാഗമാണോ ഈ തീരുമാനമെന്ന് അദ്ദേഹം സംശയം പ്രകടിപ്പിച്ചു.
രാജ്യത്തെ കോവിഡ് വ്യാപനത്തിന്റെ പശ്ചാത്തലത്തില്‍ കൊണ്ടുവന്ന നിയന്ത്രണങ്ങളില്‍ കേന്ദ്ര സര്‍ക്കാര്‍ കൂടുതല്‍ ഇളവുകള്‍ പ്രഖ്യാപിക്കുന്ന സമയത്താണ് നിലവിലെ പരിമിതമായ യാത്രാ സൗകര്യം പോലും നിഷേധിക്കുന്നതെന്നും കാനം ആരോപിച്ചു. തീവണ്ടികള്‍ നിര്‍ത്തലാക്കാനുള്ള തീരുമാനം റെയില്‍വെ മന്ത്രാലയം പിന്‍വലിക്കണമെന്നും അദ്ദേഹം ആവശ്യപ്പെട്ടു.
വിഷയത്തില്‍ കേന്ദ്രസര്‍ക്കാര്‍ അടിയന്തരമായി ഇടപെടണമെന്നും കൂടുതല്‍ പാസഞ്ചര്‍ തീവണ്ടികള്‍ ഓടിച്ചും ഓടിക്കൊണ്ടിരിക്കുന്ന തീവണ്ടികള്‍ക്ക് കൂടുതല്‍ സ്റ്റോപ്പുകള്‍ അനുവദിച്ചും യാത്രാ ദുരിതം പരിഹരിക്കണമെന്നും കാനം രാജേന്ദ്രന്‍ പുറത്തിറക്കിയ പ്രസ്താവനയില്‍ പറയുന്നു.
