ബ്രിട്ടനില്‍ നിന്നെത്തുന്നവര്‍ക്ക് കോവിഡ് നെഗറ്റീവ് സര്‍ട്ടിഫിക്കറ്റ് നിര്‍ബന്ധമെന്ന് കേന്ദ്രസര്‍ക്കാര്‍. ഇതിനുള്ള മാര്‍ഗനിര്‍ദേശങ്ങള്‍ സര്‍ക്കാര്‍ പുറത്തിറക്കി. ആര്‍.ടി-പി.സി.ആര്‍ പരിശോധനയാണ് യു.കെയില്‍ നിന്നെത്തുന്നവര്‍ നടത്തേണ്ടത്.
ജനുവരി 30 വരെയായിരിക്കും പുതിയ നിബന്ധന ബാധകമാക്കുക. അതിന് ശേഷം സ്ഥിതി വിലയിരുത്തി സര്‍ക്കാര്‍ തീരുമാനം പുനഃപരിശോധിക്കും. യു.കെയില്‍ നിന്നെത്തുന്ന എല്ലാ യാത്രക്കാരും സെല്‍ഫ് ഡിക്ലറേഷന്‍ ഫോം സമര്‍പ്പിക്കണം. യാത്രക്ക് 72 മണിക്കൂര്‍ മുമ്പ് ഓണ്‍ലൈനായാണ് അപേക്ഷ സമര്‍പ്പിക്കേണ്ടത്. കോവിഡ് നെഗറ്റീവ് സര്‍ട്ടിഫിക്കറ്റ് ഉള്ളവരെ മാത്രം വിമാനത്തില്‍ കയറാന്‍ അനുവദിച്ചാല്‍ മതിയെന്ന് കമ്പനികള്‍ക്കും നിര്‍ദേശം നല്‍കിയിട്ടുണ്ട്.
യു.കെയില്‍ ജനിതകമാറ്റം സംഭവിച്ച കൊറോണ വൈറസ് കണ്ടെത്തിയതിനെ തുടര്‍ന്ന് ഇന്ത്യയിലും ജാഗ്രത തുടരുകയാണ്. വൈറസ് കണ്ടെത്തിയതിന് പിന്നാലെ യു.കെ വിമാനങ്ങളുടെ സര്‍വീസ് ഇന്ത്യ നിര്‍ത്തിവെച്ചിരുന്നു.
