ന്യൂഡല്‍ഹി: രാജ്യത്ത് കോവിഡ് വ്യാപനം അടുത്ത ഫെബ്രുവരിയോടെ ഇല്ലാതാകുമെന്ന് വിദഗ്ധ സംഘം. നിലവിലെ കോവിഡ് പ്രതിരോധ മാര്‍ഗങ്ങളായ മാസ്‌ക് ഉപയോഗവും സാമൂഹിക അകലവും കൃത്യമായി പാലിച്ചാല്‍ രോഗം ഫെബ്രുവരിയോടെ പൂര്‍ണമായും നിയന്ത്രണത്തിലാക്കാന്‍ കഴിയുമെന്നാണ് കേന്ദ്ര സര്‍ക്കാര്‍ നിയോഗിച്ച വിദഗ്ധ സമിതിയുടെ കണ്ടെത്തല്‍.
സെപ്റ്റംബറോടെ രോഗവ്യാപനം അതിന്റെ മൂര്‍ധന്യാവസ്ഥയില്‍ എത്തിയിരുന്നതായും വിദഗ്ധ സംഘം വ്യക്തമാക്കി. കേന്ദ്ര ശാസ്ത്ര സാങ്കേതിക മന്ത്രാലയം ഹൈദരാബാദ് ഐഐടി പ്രൊഫസര്‍ വിദ്യാസാഗറിന്റെ നേതൃത്വത്തില്‍ നിയോഗിച്ച വിദഗ്ധ സംഘത്തിന്റെ പഠനത്തിലാണ് ഇക്കാര്യം പറയുന്നത്.
കോവിഡ് വ്യാപനം അതിന്റെ മൂര്‍ധന്യാവസ്ഥയിലെത്തിയ സമയത്ത് സജീവ കോവിഡ് രോഗികളുടെ എണ്ണം 10.17 ലക്ഷം ആയിരുന്നു. എന്നാല്‍ പിന്നീട് രോഗികളുടെ എണ്ണം കുറയുകയായിരുന്നു. വരും മാസങ്ങളില്‍ രോഗികളുടെ എണ്ണം വര്‍ദ്ധിച്ചാലും കഴിഞ്ഞ മാസത്തിനേക്കാള്‍ കൂടില്ലെന്നാണ് സംഘത്തിന്റെ കണ്ടെത്തല്‍. അടുത്ത ഫെബ്രുവരിയോടെ ആകെ രോഗബാധിതരുടെ എണ്ണം ഒരു കോടി ആറ് ലക്ഷം ആയിരിക്കുമെന്നും സംഘം വ്യക്തമാക്കുന്നു.
അതേസമയം രോഗവ്യാപനം തടയുന്നതിനും മരണം നിയന്ത്രിക്കുന്നതിനും മാര്‍ച്ചില്‍ ഏര്‍പ്പെടുത്തിയ ലോക്ഡൗണ്‍ ഫലപ്രദമായിരുന്നുവെന്നും വിദഗ്ധ സംഘത്തിന്റെ റിപ്പോര്‍ട്ടില്‍ പറയുന്നു. ലോക്ഡൗണ്‍ ഏര്‍പ്പെടുത്താത്ത പക്ഷം ജൂണില്‍ 1.4 കോടി കോവിഡ് രോഗികളും 26 ലക്ഷം കോവിഡ് മരണവും രാജ്യത്ത് ഉണ്ടായേനെ എന്നും സംഘം അഭിപ്രായപ്പെട്ടു.
