ന്യൂഡല്ഹി: എം.എം ഹസ്സനെ യുഡിഎഫ് കണ്വീനര് സ്ഥാനത്തു നിന്ന് മാറ്റണമെന്ന് ആവശ്യപ്പെട്ട് കോണ്ഗ്രസ് എംഎല്എമാരും എംപിമാരും ഹൈക്കമാന്റിന് കത്ത് നല്കി. ഇവര്ക്ക് പിന്നാലെ കെപിസിസി ഭാരവാഹികളും ഹസ്സനെ മാറ്റണമെന്ന ആവശ്യവുമായി ഹൈക്കമാന്റിനെ സമീപിച്ചിട്ടുണ്ട്. തദ്ദേശ തെരഞ്ഞെടുപ്പ് തോല്വിയുടെ പശ്ചാത്തലത്തിലാണ് പരാതി.
പാര്ട്ടിയും യുഡിഎഫ് സംവിധാവനവും രണ്ടു തട്ടിലാണെന്ന് വരുത്തി തീര്ക്കുന്ന പ്രസ്താവനകളാണ് തിരഞ്ഞെടുപ്പ് വേളകളില് ഹസ്സന് നടത്തിയതെന്നും പരാതിയില് പറയുന്നു. കേരളത്തിന്റെ ചുമതലയുള്ള താരിഖ് അന്വര്, സംഘടനകാര്യ ജനറല് സെക്രട്ടറി കെ.സി.വേണുഗോപാല് തുടങ്ങിയവര്ക്കടക്കമാണ് പരാതി ലഭിച്ചിട്ടുള്ളത്.
കെപിസിസി നേതൃത്വത്തെ പോലും പരസ്യമായി എതിര്ത്തു. പാര്ട്ടിയോട് ആലോചിക്കാതെ നിലപാടുകള് പരസ്യപ്പെടുത്തി. ഹസ്സന് വെല്ഫെയര് പാര്ട്ടി നേതാക്കളെ കണ്ടതടക്കം നേതാക്കള് കത്തില് ചൂണ്ടിക്കാട്ടി. ഹസ്സനുമായി മുന്നോട്ടു പോകുന്നത് യുഡിഎഫിന്റെ കെട്ടുറപ്പിനെ ബാധിക്കുമെന്നും നിയമസഭാ തെരഞ്ഞെടുപ്പില് കനത്ത തിരിച്ചടിക്കിത് കാരണമാകുമെന്നും കത്തില് ചൂണ്ടിക്കാട്ടുന്നു.
