തിരുവനന്തപുരം: ഫുട്ബോള് ഇതിഹാസ താരം മറഡോണയുടെ വിയോഗത്തില് അനുശോചനം അറിയിച്ച് മുഖ്യമന്ത്രി പിണറായി വിജയന്. അദ്ദേഹത്തിന്റെ വേര്പാടില് ലോകമെങ്ങുമുള്ള ഫുട്ബോള് പ്രേമികള്ക്കൊപ്പം കേരള ജനതയും ദുഃഖിക്കുന്നുവെന്ന് മുഖ്യമന്ത്രി പറഞ്ഞു. ലോകത്തെ ഏറ്റവും സുന്ദരമായ ഗെയിമാണ് ഫുട്ബോള്. ആ കലയിലെ ഏറ്റവും ജനപ്രിയനായ താരമായിരുന്നു മറഡോണ. അര്ജന്റീനക്ക് പുറത്ത് അദ്ദേഹത്തിന് ഏറ്റവും കൂടുതല് ആരാധകരുളളത് കേരളത്തിലായിരിക്കുമെന്നും മുഖ്യമന്ത്രി പറഞ്ഞു.
1986 അര്ജന്റീന ലോകകപ്പ് ഉയര്ത്തിയതുമുതല് കേരളത്തിലെ ഫുട്ബോള് പ്രേമികളുടെ മനസ്സില് ആ മാന്ത്രിക താരത്തിന് വലിയ സ്ഥാനമുണ്ട്. ലോകകപ്പ് മത്സരം ലോകത്തിലെ ഏത് കോണില് നടക്കുമ്പോഴും അദ്ദേഹത്തിന്റെ ചിത്രങ്ങള് ഏറ്റവുമധികം ഉയരുന്നത് ഈ കൊച്ചുകേരളത്തിലാണെന്ന് മുഖ്യമന്ത്രി പറഞ്ഞു.
1986 ലോകകപ്പില് അഞ്ച് ഇംഗ്ലീഷ് താരങ്ങളെയും വിഖ്യാത ഗോളി പീറ്റര് ഷില്ട്ടനെയും മറികടന്ന് മറഡോണ നേടിയ ഗോള് ലോകം ദര്ശിച്ച ഏറ്റവും സുന്ദരവും സമര്ത്ഥവുമായ ഗോളാണ്. അത് ഏറെക്കാലം അങ്ങിനെതന്നെ നിലനില്ക്കും. അര്ജന്റീന ലോകഫുട്ബോളിലെ പ്രബലര് ആണെങ്കിലും ആ രാജ്യത്തെ ഫുട്ബോളിന്റെ നെറുകയില് എത്തിച്ചത് മറഡോണയാണ്. ക്യൂബയുടെയും ഫിദല് കാസ്ട്രോയുടെയും അടുത്ത സുഹൃത്തായിരുന്നു മറഡോണ എന്നത് അദ്ദേഹത്തിന്റെ സാമ്രാജ്യത്വ വിരുദ്ധ നിലപാടിന്റെ തെളിവാണ്. ആ മഹാനായ ഫുട്ബോളര് എന്നും സോഷ്യലിസ്റ്റ് പക്ഷത്ത് ധീരമായി നിലകൊണ്ടുവെന്നും മുഖ്യമന്ത്രി കൂട്ടിച്ചേര്ത്തു.
