ന്യൂഡല്‍ഹി: ബിഹാറില്‍ മൂന്നാം ഘട്ടങ്ങളിലായി നിയമസഭ തെരഞ്ഞെടുപ്പ് നടത്തുമെന്ന് മുഖ്യതെരഞ്ഞെടുപ്പ് കമീഷണര്‍ സുനില്‍ അറോറ. ഒന്നാം ഘട്ടത്തില്‍ ഒക്ടോബര്‍ 28ന് 71 മണ്ഡലങ്ങളില്‍ തെരഞ്ഞെടുപ്പ് നടക്കും. നവംബര്‍ മൂന്നിന് നടക്കുന്ന രണ്ടാം ഘട്ടത്തില്‍ 94 മണ്ഡലങ്ങളിലാവും വോട്ടെടുപ്പ്. നവംബറിന് ഏഴിന് നടക്കുന്ന മൂന്നാംഘട്ട തെരഞ്ഞെടുപ്പില്‍ 78 മണ്ഡലങ്ങളാണ് പോളിങ് ബൂത്തിലേക്ക് പോവുക. നവംബര്‍ 10ന് വോട്ടെണ്ണും.
പൗരന്‍മാരുടെ അവകാശങ്ങള്‍ സംരക്ഷിക്കാന്‍ ബാധ്യസ്ഥരാണെന്ന് മുഖ്യ തെരഞ്ഞെടുപ്പ് കമീഷണര്‍ പറഞ്ഞു. കോവിഡ് രോഗലക്ഷണമുള്ളവര്‍ക്ക് പോസ്റ്റല്‍ വോട്ട് സൗകര്യം നല്‍കും. പോളിങ് സമയം ഒരുമണിക്കൂര്‍ നീട്ടും. നാമനിര്‍ദേശ പത്രിക സമര്‍പ്പിക്കല്‍ പരമാവധി ഓണ്‍ലൈനായി നടത്തും.
വീട് കയറിയുള്ള പ്രചാരണത്തിന് അഞ്ച് പേര്‍ക്ക് മാത്രമായിരിക്കും അനുമതി. വാഹനപ്രചാരണത്തിന് പരമാവധി രണ്ട് വാഹനങ്ങള്‍ മാത്രമായിരിക്കും അനുവദിക്കുകയെന്നും തെരഞ്ഞെടുപ്പ് കമീഷണര്‍ വ്യക്തമാക്കി. ഒരു ബൂത്തില്‍ പരമാവധി ആയിരം പേര്‍ മാത്രമായിരിക്കും ഉണ്ടാവുക. നേരത്തെ ഇത് ആയിരത്തി അഞ്ഞൂറായിരുന്നു.
തെരഞ്ഞെടുപ്പിനായി ഏഴ് ലക്ഷം ഹാന്‍ഡ് സാനിറ്റൈസറുകളും 46 ലക്ഷം മാസ്കുകളും 6 ലക്ഷം പി.പി.ഇ കിറ്റുകളും 6.7 ലക്ഷം മുഖാവരണങ്ങളും 23 ലക്ഷം ഗ്ലൗസുകളും ഒരുക്കുമെന്ന് തെരഞ്ഞെടുപ്പ് കമീഷണര്‍ അറിയിച്ചു. വോട്ടര്‍മാര്‍ക്കായി പുനരുപയോഗിക്കാന്‍ കഴിയാത്ത 7.2 കോടി ഗ്ലൗസുകളും ഒരുക്കുമെന്നും മുഖ്യതെരഞ്ഞെടുപ്പ് കമീഷണര്‍ സുനില്‍ അറോറ പറഞ്ഞു.
