ന്യൂഡല്‍ഹി: കോവിഡ് വ്യാപനത്തിനിടയില്‍ രാജ്യത്തെ സാമ്പത്തിക രംഗം പ്രതീക്ഷയോടെ കാത്തിരിക്കുന്ന കേന്ദ്ര ബജറ്റ് ഇന്ന്. ധനമന്ത്രി നിര്‍മലാ സീതാരാമനാണ് ബജറ്റ് അവതരിപ്പിക്കുന്നത്. ബജറ്റ് അവതരണത്തിന് അനുമതി തേടുന്നതിനായി ധനമന്ത്രി രാഷ്ട്രപതി ഭവനിലേക്ക് പുറപ്പെട്ടു. രാവിലെ പതിനൊന്നിനാണ് ബജറ്റ് അവതരണം.
ബജറ്റ് ജനങ്ങളുടെ പ്രതീക്ഷയ്ക്ക് അനുസൃതമാവുമെന്ന് കേന്ദ്ര ധനകാര്യ സഹമന്ത്രി അനുരാഗ് സിങ് ഠാക്കൂര്‍ പറഞ്ഞു. കോവിഡ് കാരണം മാന്ദ്യത്തിലായ സമ്പദ് വ്യവസ്ഥയുടെ തിരിച്ചുവരവിന് ഉത്തേജനം നല്‍കുന്ന പ്രഖ്യാപനങ്ങള്‍ ഉണ്ടോകുമോയെന്ന ആകാംക്ഷയിലാണ് രാജ്യം. അസ്വസ്ഥമായ കാര്‍ഷികമേഖലയ്ക്ക് കൂടുതല്‍ പ്രഖ്യാപനങ്ങളും പ്രതീക്ഷിക്കുന്നു. ആത്മനിര്‍ഭര്‍ ഭാരതിന്റെ ഭാഗമായുള്ള നടപടികള്‍ക്ക് ഊന്നല്‍ ലഭിക്കും.
സാമ്പത്തികമാന്ദ്യം ഗ്രസിച്ചു തുടങ്ങിയ ഘട്ടത്തിലാണ് രാജ്യത്തെ കോവിഡ് ബാധിച്ചത്. 2019-20-ല്‍ മൊത്ത ആഭ്യന്തര ഉത്പാദനം നാലു ശതമാനമായി കുറഞ്ഞു. നിക്ഷേപരംഗത്തും കനത്ത ഇടിവ് ഉണ്ടായി. കോവിഡ് കാരണമുണ്ടായ സാമ്പത്തികപ്രതിസന്ധി നിയന്ത്രിക്കാന്‍ രണ്ട് സാമ്പത്തിക പാക്കേജുകള്‍ കേന്ദ്രം പ്രഖ്യാപിച്ചിരുന്നു.
