തിരുവനന്തപുരം: സിഎജി റിപ്പോര്‍ട്ടില്‍ അഭിപ്രായങ്ങള്‍ ഉള്‍പ്പെടുത്തുന്നതിന് മുന്‍പ് സര്‍ക്കാരിന് വിശദീകരണം നല്‍കാന്‍ അവസരം നല്‍കണമെന്ന് ധനമന്ത്രി തോമസ് ഐസക്.സര്‍ക്കാരിന്റെ മറുപടിയുടെ അടിസ്ഥാനത്തില്‍ കരട് ഓഡിറ്റ് റിപ്പോര്‍ട്ട് പരിഷ്‌കരിക്കുകയോ സര്‍ക്കാരിന്റെ മറുപടി നിരസിക്കുകയോ ചെയ്യാം. സര്‍ക്കാരിനെ അറിയിച്ചിട്ടില്ലാത്ത പുതിയ ഏതെങ്കിലും അഭിപ്രായമോ നിരീക്ഷണമോ പാടില്ലെന്നും ധനമന്ത്രി വിശദീകരിച്ചു.
ധനമന്ത്രി സി എ ജി റിപ്പോര്‍ട്ട് ചോര്‍ത്തിയെടുത്ത് പുറത്ത് നല്‍കിയത് സത്യപ്രതിജ്ഞാ ലംഘനമാണെന്ന് വി ഡി സതീശന്‍ എംഎല്‍എ വിമര്‍ശിച്ചു. ഇത് വിചിത്രമായ നടപടിയാണ്.സിഎജി റിപ്പോര്‍ട്ട് സഭയുടെ മേശപ്പുറത്ത് വെക്കുമ്പോള്‍ ധനമന്ത്രിയുടെ പ്രസ്താവനക്ക് പ്രസക്തിയില്ല.നിയമസഭയില്‍ അങ്ങനെ ഒരു കീഴ് വഴക്കമില്ല. ചട്ടങ്ങളിലും ധനമന്ത്രിയുടെ പ്രസ്താവനയെ കുറിച്ച് പറയുന്നില്ല. സിഎജി റിപ്പോര്‍ട്ടിന്റെ പവിത്രത കളഞ്ഞു എന്നും പ്രതിപക്ഷം ആരോപിച്ചു.
ധനമന്ത്രിക്കെതിരായ പരാതി പ്രിവിലേജസ് കമ്മിറ്റിയുടെ പരിഗണനയിലാണെന്ന് സ്പീക്കര്‍ മറുപടി നല്‍കി. കരട് റിപ്പോര്‍ട്ടില്‍ ഇല്ലാതിരുന്ന കാര്യങ്ങള്‍ എഴുതി ചേര്‍ത്തെന്ന് ധനമന്ത്രി തുടര്‍ന്ന് വിശദീകരിച്ചു. നടപടി ക്രമങ്ങള്‍ പാലിച്ചല്ല സിഎജി റിപ്പോര്‍ട്ടെന്നും അദ്ദേഹം പറഞ്ഞു.
മന്ത്രിയുടെ വിശദീകരണം ചട്ട പ്രകാരമാണെന്ന് സ്പീക്കര്‍ വ്യക്തമാക്കി. ഗവര്‍ണറുടെ അനുമതിയോടെയാണ് വിശദീകരണം. മന്ത്രിയുടെ വിശദീകരണം പി എ സി ക്ക് പരിശോധിക്കാം. അസാധാരണ സാഹചര്യവും പി എ സി പരിശോധിക്കുമെന്നും സ്പീക്കര്‍ പറഞ്ഞു.
