ബെഗളൂരു: ബിജെപി എംപിമാര്ക്കും എംഎല്എമാര്ക്കുമെതിരെയുള്ള കേസുകള് പിന്വലിക്കാന് തീരുമാനിച്ച് കര്ണാടക സര്ക്കാര്. നിയമോപദേശം മറികടന്നാണ് ചില ജനപ്രതിനിധികള്ക്കെതിരെയുള്ള വധശ്രമം അടക്കമുള്ള കേസുകള് പിന്വലിക്കാന് സര്ക്കാര് തീരുമാനിച്ചത്.
സംഘപരിവാര് നേതാക്കള് അടക്കമുള്ളവര്ക്കെതിരായ 63 കേസുകള് പിന്വലിക്കാനാണ് ഓഗസ്റ്റില് നടന്ന മന്ത്രിസഭാ യോഗത്തില് തീരുമാനമായത്. ആഭ്യന്തര മന്ത്രി ബസവരാജ് ബൊമ്മൈ അധ്യക്ഷനായ സമിതിയുടെ റിപ്പോര്ട്ടിനെ തുടര്ന്നാണ് നടപടി.
വനം വകുപ്പ് മന്ത്രി അനന്ത് സിംഗ്, കൃഷിമന്ത്രി ബിസി പാട്ടീല്, മുഖ്യമന്ത്രിയുടെ പൊളിറ്റിക്കല് സെക്രട്ടറി എംപി രേണുകാചാര്യ, മൈസൂരു-കൊഡഗു എംപി പ്രതാപ് സിംഹ, ഹവേരി എംഎല്എ നെഹ്റു ഒലേക്കര് തുടങ്ങിയ പ്രമുഖര്ക്കെതിരെയുള്ള കേസുകളാണ് പിന്വലിക്കുന്നത്. രേണുകാചാര്യക്കെതിരെ വധശ്രമത്തിനാണ് കേസുള്ളത്.
നേരത്തെ കോണ്ഗ്രസ്-ജെഡിഎസ് സര്ക്കാര് അവരുടെ നേതാക്കള്ക്കെതിരെയുള്ള കേസ് നിയമോപദേശം മറികടന്നും പിന്വലിച്ചിരുന്നെന്ന് നിയമ മന്ത്രി ജെ.സി മധുസ്വാമി പറഞ്ഞു. കേസുകള് പിന്വലിക്കുന്നതോടെ കോടതികളുടെ ജോലി ഭാരം കുറയുമെന്നാണ് മന്ത്രിയുടെ വിശദീകരിണം.
അതേസമയം കലാപക്കേസുകളില് ഉള്പ്പെട്ടവരുടേതക്കമുള്ള കേസുകളാണ് പിന്വലിക്കുന്നതെന്നും ബിജെപിയുടെ ഒളിയജണ്ടകളാണ് പുറത്തു വരുന്നതെന്നും കെപിസിസി വര്ക്കിംഗ് പ്രസിഡന്റ് സലീം അഹമ്മദ് ആരോപിച്ചു.
അതേസമയം കോണ്ഗ്രസിന് വിമര്ശിക്കാന് അവകാശമില്ലെന്നും രാജ്യ വിരുദ്ധ കേസുകളില് ഉള്പ്പെട്ട എസ്.ഡി.പി.ഐ-പോപ്പുലര് ഫ്രണ്ട് പ്രവര്ത്തകര്ക്കെതിരെയുള്ള കേസുകള് സിദ്ധരാമയ്യ സര്ക്കാര് പിന്വലിച്ചെന്നും സാംസ്കാരിക മന്ത്രി സി.ടി രവി പ്രതികരിച്ചു.
