ന്യൂഡല്ഹി: ബ്രിട്ടനില് നിന്നുള്ള വിമാനങ്ങള്ക്കുള്ള വിലക്ക് നീട്ടിയേക്കുമെന്ന് കേന്ദ്ര വ്യോമയാനമന്ത്രി ഹര്ദീപ് സിങ് പുരി. രണ്ടു ദിവസത്തിനുള്ളില് ഈ വിഷയത്തില് അന്തിമതീരുമാനം ഉണ്ടാകുമെന്ന് അദ്ദേഹം അറിയിച്ചു. ജനിതക വകഭദം വന്ന കോവിഡ് വൈറസ് ബ്രിട്ടനില് പടരുന്ന സാഹചര്യത്തിലാണ്, അവിടെ നിന്നുള്ള യാത്രാവിമാനങ്ങള്ക്ക് ഇന്ത്യ വിലക്കേര്പ്പെടുത്തിയത്.
ബ്രിട്ടനില് നിന്നെത്തിയ ആറുപേരില് ജനിതക വകഭേദം വന്ന വൈറസിനെ കണ്ടെത്തിയിരുന്നു. ഇതില് മൂന്നു പേര് കര്ണാടകക്കാരും ഒരാള് തമിഴ്നാട് സ്വദേശിയുമാണ്. പുതിയ വൈറസിനെ കണ്ടെത്തിയ സാഹചര്യത്തില് രാജ്യത്തെ വിമാനത്താവളങ്ങളില് ജാഗ്രത പുലര്ത്തിയിട്ടുണ്ട്.
കഴിഞ്ഞ 10 ദിവസത്തിനിടെ ബ്രിട്ടനില് നിന്നും രാജ്യത്ത് 233 പേരാണ് തിരികെ എത്തിയത്. നവംബര് 25 നും ഡിസംബര് 23 നും ഇടയ്ക്ക് രാജ്യത്തെ വിവിധ വിമാനത്താവളങ്ങളിലായി 33,000 പേരാണ് ഇറങ്ങിയത്. കഴിഞ്ഞ രണ്ടാഴ്ചയ്ക്കിടെ വിദേശത്തു നിന്നും രാജ്യത്തെത്തിയ എല്ലാവരും ജീനോം സീക്വന്സിങ് ടെസ്റ്റിന് വിധേയരാകണമെന്ന് കേന്ദ്ര ആരോഗ്യമന്ത്രാലയം നിര്ദേശിച്ചിട്ടുണ്ട്.
