സന്ദര്‍ശക വീസയിലെത്തി ഭിക്ഷാടനം നടത്തുന്നവരെ കണ്ടെത്തി നാടുകടത്തും പിന്നീട് യുഎഇയിലേക്ക് വരാനാകാതെ യാത്രാവിലക്കും
ദുബായ് : റമദാന്‍ കാലത്ത് അനധികൃത പിരിവുകള്‍ തടയാന്‍ അധികൃതര്‍ കര്‍ശന നടപടികള്‍ സ്വീകരിക്കുന്നു.
അര്‍ഹരായവര്‍ക്ക് ധനസഹായമുള്‍പ്പടെ ചെയ്യാന്‍ ഔദ്യോഗിക സംവിധാനങ്ങള്‍ ഉള്ളപ്പോള്‍ വ്യാജ പണപ്പിരുവകളില്‍ കുടുങ്ങരുതെന്ന് പൊതുജനങ്ങള്‍ക്ക് യുഎഇ അധികൃതര്‍ മുന്നറിയിപ്പ് നല്‍കി.
ഏഷ്യ, ആഫ്രിക്ക എന്നിവിടങ്ങളില്‍ നിന്നും നിരവധി പേരാണ് ഭിക്ഷാടനത്തിനായി യുഎഇയില്‍ എത്തുന്നത്. ഇവരെ കണ്ടെത്തിയാല്‍ പിടികൂടി നാടുകടത്തുമെന്നും പിന്നീട് യുഎഇയിലേക്ക് വരാന്‍ കഴിയാത്തവിധം യാത്രാവിലക്ക് ഏര്‍പ്പെടുത്തുമെന്നും അധികൃതര്‍ പറഞ്ഞു.
റമദാന്‍ കാലത്തെ സക്കാ ത്ത് പ്രവര്‍ത്തികളില്‍ നിന്ന് മുതലെടുക്കാന്‍ പലരും വ്യാജ കഥകളുമായി സമീപിക്കുക പതിവാണെന്നും സോഷ്യല്‍ മീഡിയ,ഓണ്‍ ലൈന്‍ തട്ടിപ്പുകളും വ്യാപകമാണെന്നും പരാതി ഉയര്‍ന്നിട്ടുണ്ട്.
ആരാധനാലയങ്ങള്‍, ആശുപത്രികള്‍. വിദ്യാലയങ്ങള്‍ എന്നിവ നിര്‍മിക്കാനും ധനസമാഹരണം നടത്തുവെന്ന് കാണിച്ചും രോഗചികിത്സയ്ക്ക് പണം വേണമെന്ന് അഭ്യര്‍ത്ഥിച്ചും നിരവധി സന്ദേശങ്ങളാണ് സാമൂഹ്യ മാധ്യമങ്ങളിലൂടെ എത്തുന്നത്.
ഭിക്ഷാടനം നടത്തുന്നത് ശ്രദ്ധയില്‍പ്പെട്ടാല്‍ പോലീസ് ക്രിമിനല്‍ കേസ് എടുക്കുും. യാചക വേഷത്തില്‍ എത്തുന്നവരേയും ഇതിനു പിന്നില്‍ പ്രവര്‍ത്തിക്കുന്ന സംഘങ്ങളേയും കണ്ടെത്തി കനത്ത പിഴശിക്ഷയും നല്‍കുമെന്ന് അധികൃതര്‍ പറഞ്ഞു. ഒരു ലക്ഷം ദിര്‍ഹം വരെ പിഴശിക്ഷ ലഭിക്കാം. ഇവരുടെ ക്രിമിനല്‍ സ്വഭാവം പരിഗണിച്ചാകും പിഴ ശിക്ഷയെന്ന് പോലീസ് പറഞ്ഞു. ഭിക്ഷാടത്തിന് ആളുകളെ എത്തിക്കുന്നവര്‍ക്ക് മൂന്നു മാസം തടവും 50,000 ദിര്‍ഹം പിഴയും ശിക്ഷയും ലഭിക്കും.
