മലപ്പുറം: കരിപ്പൂര്‍ വിമാനാപകടത്തില്‍ പരുക്കേറ്റ് ചികിത്സയിലായിരുന്ന ഒരാള്‍ കൂടി മരിച്ചു. നരിപ്പറ്റ കാഞ്ഞരാടന്‍ വീട്ടില്‍ പ്രമോദിന്‍റെ ഭാര്യ മഞ്ജുളകുമാരി (38) ആണ് മരിച്ചത്. കോഴിക്കോട് സ്വകാര്യ ആശുപത്രിയില്‍ ചികിത്സയിലായിരുന്ന ഇവര്‍ ഭര്‍ത്താവിനൊപ്പം ദുബായിലെ റാസല്‍ഖൈമയിലായിരുന്നു.
സുഹൃത്ത് രമ്യാ മുരളീധരനൊപ്പമാണ് മഞ്ജുളകുമാരി നാട്ടിലേക്ക് മടങ്ങിയത്. ഇതോടെ കരിപ്പൂര്‍ വിമാനാപകടത്തിലെ ആകെ മരണം 21 ആയി. ഓഗസ്റ്റ് ഏഴിനാണ് കരിപ്പൂര്‍ വിമാനത്താവളത്തില്‍ അപകടമുണ്ടായത്. ലാന്‍ഡിംഗിനിടെ എയര്‍ ഇന്ത്യ എക്സ്പ്രസിന്‍റെ ദുബായ്-കോഴിക്കോട് വിമാനം റണ്‍വേയില്‍ നിന്ന് നിയന്ത്രണം തെറ്റി കോംപൗണ്ട് വാളില്‍ ഇടിച്ച്‌ പിളരുകയായിരുന്നു.
