ന്യൂഡല്‍ഹി: കര്‍ഷകരെ പിന്തുണച്ച ട്വിറ്റര്‍ അക്കൗണ്ടുകല്‍ പൂട്ടിയതിന് പിന്നാലെ സമര ഗാനങ്ങള്‍ക്കും ഇന്റര്‍നെറ്റില്‍ വിലക്ക്. പഞ്ചാബി ഗായകന്‍ കന്‍വര്‍ ഗ്രെവാളിന്റെ ഐലാന്‍, ഹിമാത് സന്ധുവിന്റെ അസി വദാംഗെ എന്നീ സംഗീത വീഡിയോകളാണ് യൂട്യൂബ് നീക്കം ചെയ്തത്. കേന്ദ്രസര്‍ക്കാരിന്റെ പരാതിയ തുടര്‍ന്നാണ് നടപടി.
കര്‍ഷക സമരത്തെ അനുകൂലിച്ചുള്ള ഹിമാത് സന്ധുവിന്റെ സംഗീത വീഡിയോ നാല് മാസം മുന്‍പാണ് യൂട്യൂബില്‍ പോസ്റ്റ് ചെയ്തത്. ഈ ഗാനത്തിന് 13 ദശലക്ഷം കാഴ്ചക്കാര്‍ ഉണ്ടായി. കന്‍വറിന്റെ ഗാനം സമര സംഗീതമായി മാറുകയും ഗായകന്‍ പ്രക്ഷോഭത്തിന്റെ മുഖങ്ങളിലൊന്നാവുകയും ചെയ്തു. ഈ ഗാനം നീക്കം ചെയ്യുന്നതുവരെ ഒരു കോടി ആളുകളാണ് കണ്ടത്.
കര്‍ഷകരാണ് കൃഷിയെക്കുറിച്ചുള്ള തീരുമാനമെടുക്കേണ്ടത് മറ്റാരുമല്ല എന്നാണ് ഈ ഗാനത്തിന്റെ സന്ദേശം. യൂട്യൂബില്‍ നിന്ന് ഇവ നീക്കം ചെയ്യാന്‍ സര്‍ക്കാരിന് കഴിയുമെങ്കിലും ജനങ്ങളുടെ ഹൃദയത്തില്‍ നിന്ന് ഗാനങ്ങള്‍ മായ്ക്കാന്‍ കഴിയില്ലെന്ന് കര്‍ഷക നേതാവ് ഷിംഗാര സിംഗ് മാന്‍ പറഞ്ഞു. കര്‍ഷക സമരത്തെ അടിച്ചമര്‍ത്താന്‍ കേന്ദ്രം പല വഴികളും നോക്കുമ്പോഴും ഒരടിപോലും പിന്നോട്ടില്ലെന്ന ഉറച്ച നിലപാടിലാണ് കര്‍ഷകര്‍.
