തിരുവനന്തപുരം: തദ്ദേശഭരണ തെരഞ്ഞെടുപ്പിലേറ്റ തിരിച്ചടിയില്‍ അതൃപ്തി പരസ്യമാക്കി ആര്‍എസ്പിയും. യുഡിഎഫ് യോഗത്തിന് മുന്‍പ് കോണ്‍ഗ്രസ് നേതാക്കളെ കണ്ട് അതൃപ്തി അറിയിക്കാനാണ് ആര്‍എസ്പിയുടേയും തീരുമാനം. കടുത്ത അതൃപ്തി പാര്‍ട്ടിക്കുള്ള സാഹചര്യത്തില്‍ മുന്നണിയില്‍ ഇങ്ങനെ തുടര്‍ന്ന് പോകണോ എന്ന് വരെ ആലോചിക്കുന്നുണ്ടെന്നാണ് ആര്‍എസ്പി നേതാക്കള്‍ നല്‍കുന്ന വിവരം. യുഡിഎഫില്‍ എത്തിയ ശേഷം ആര്‍എസ്പിക്ക് നഷ്ടത്തിന്റെ കഥകള്‍ മാത്രമേയുള്ളു.
തദ്ദേശഭരണ തെരഞ്ഞെടുപ്പില്‍ കൊല്ലമടക്കമുള്ള ജില്ലകളില്‍ തകര്‍ന്നടിഞ്ഞു. ഇങ്ങനെ പോയാല്‍ പാര്‍ട്ടി തന്നെ ഇല്ലാതാകുമെന്ന് പ്രാദേശിക നേതാക്കള്‍ മുന്നറിയിപ്പ് നല്‍കുന്നു. ചാനല്‍ ചര്‍ച്ചകളില്‍ ചതുരവടിവില്‍ വര്‍ത്തമാനം പറഞ്ഞും പത്രസമ്മേളനങ്ങളില്‍ മേനി നടിച്ചും ഫെയ്‌സ്ബുക്കില്‍ പോസ്റ്റിട്ട് നടന്നിട്ടും കാര്യമില്ലെന്നും സംസ്ഥാന നേതൃത്വത്തെ ഇവര്‍ ഓര്‍മിപ്പിക്കുന്നു.
തദ്ദേശഭരണ സ്ഥാപനങ്ങളിലേക്ക് നടന്ന തെരഞ്ഞെടുപ്പിലുണ്ടായ കനത്ത തിരിച്ചടിയെ തുടര്‍ന്ന് വലിയ പൊട്ടിത്തെറിയാണ് യുഡിഎഫിലും കോണ്‍ഗ്രസിനകത്തും നടക്കുന്നത്. മുസ്ലീം ലീഗും കേരളാ കോണ്‍ഗ്രസും അടക്കമുള്ള ഘടകക്ഷികള്‍ ഇതിനകം അതൃപ്തി പരസ്യമാക്കി രംഗത്തെത്തിയിരുന്നു. അതിന് പിന്നാലെയാണ് മുന്നണി ബന്ധം അടക്കം പുന:പരിശോധിക്കേണ്ടി വരുമെന്ന സൂചന നല്‍കി ആര്‍എസ്പി രംഗത്തെത്തുന്നത്.
