മക്ക: 2025-ലെ ഹജ് സീസണിന്റെ ഭാഗമായായി, സൗദി അറേബ്യയുടെ തപാൽ വകുപ്പ് (Saudi Post) അതിന്റെ പുതിയ ഡിസൈൻ അടങ്ങിയ സ്റ്റാമ്പും പോസ്റ്റ് കാർഡും പുറത്തിറക്കി. വിശുദ്ധ കഅബയെ ആലേഖനം ചെയ്തുള്ള മനോഹര ചിത്രങ്ങളാണ് സ്റ്റാമ്പിലും കാർഡിലുമുള്ളത്, ഹജ്ജിന്റെ ആത്മീയതയും പവിത്രതയും ഉൾക്കൊള്ളുന്നതായാണ് ഡിസൈൻ.
5 റിയാൽ വിലയുള്ള ഈ പോസ്റ്റ് കാർഡുകൾ, ഈദ് ആശംസകൾ കൈമാറാനും ഹജ് അനുഭവങ്ങൾ സ്മരണയായി പങ്കുവെക്കാനും അനുയോജ്യമായ രീതിയിൽ രൂപകൽപ്പന ചെയ്‌തിരിക്കുന്നു. തീർത്ഥാടകരും സന്ദർശകരും സുഹൃത്തുക്കൾക്കും ബന്ധുക്കൾക്കും പ്രത്യേകമായി സമർപ്പിക്കാവുന്ന ഉപഹാരമായി ഈ കാർഡുകൾ ഉപയോഗിക്കാവുന്നതാണ്.
ഹജ്ജിന്റെ ആഴമുള്ള ആത്മീയ അനുഭവത്തെ ഓർമ്മപ്പെടുത്തുന്ന ഈ പ്രത്യേക പതിപ്പുകൾ ഹാജിമാരുടെയും സ്റ്റാമ്പ് ശേഖരകരുടെയും ശ്രദ്ധ ആകർഷിക്കുമെന്ന് തപാൽ വകുപ്പ് വ്യക്തമാക്കി. ഹജ്ജിന്റെ അനുസ്മരണമായി നിലനിൽക്കാനാകും എന്നതോടൊപ്പം, ഇത് സൗദിയുടെ സാംസ്‌ക്കാരിക പൈതൃകത്തെ ആഗോള തലത്തിൽ പ്രദർശിപ്പിക്കുന്ന ഒരു ശ്രമം കൂടിയാണ്.
