അൽ ജൗഫ് : 18-ാമത് അൽ ജൗഫ് ഇന്റർനാഷനൽ ഒലിവ് ഫെസ്റ്റിവൽ സന്ദർശകരെയും വിനോദസഞ്ചാരികളെയും ആകർഷിക്കുന്നു. ജനുവരി 2 മുതൽ 12 വരെ സകാക്കയിലെ പ്രിൻസ് അബ്ദുല്ല കൾച്ചറൽ സെന്ററിൽ നടക്കുന്ന ഉത്സവത്തിൽ ഒലിവ്, എണ്ണ ഉൽപാദകർ, സംസ്കരണ വ്യവസായങ്ങൾ, കമ്പനികൾ, കാർഷിക അസോസിയേഷനുകൾ എന്നിവയുൾപ്പെടെ പ്രാദേശിക, രാജ്യാന്തര പങ്കാളികൾ പങ്കെടുക്കും.
ലോകത്തിലെ ഏറ്റവും വലിയ ഒലിവ് ഫാം ഗിന്നസ് വേൾഡ് റെക്കോർഡ്സ് പ്രകാരം 23 ദശലക്ഷത്തിലധികം മരങ്ങൾ ഉണ്ടെന്ന് അഭിമാനിക്കുന്ന അൽ ജൗഫ് രാജ്യത്തിന്റെ ‘ഒലിവുകളുടെ നാട്’ എന്ന് അറിയപ്പെടുന്നു. ഈ മരങ്ങൾ പ്രതിവർഷം 150,000 ടൺ ടേബിൾ ഒലിവ് ഉത്പാദിപ്പിക്കുന്നു. ഈ പ്രദേശത്ത് 16,000 ഒലിവ് ഫാമുകളും കൃഷി പദ്ധതികളും ഉൾപ്പെടുന്നു.
കുടിൽ വ്യവസായം, സംരംഭകർ, ചെറുകിട ബിസിനസുകൾ എന്നിവയിൽ പ്രവർത്തിക്കുന്ന കുടുംബങ്ങളെ അവരുടെ ഉൽപന്നങ്ങൾ പ്രദർശിപ്പിക്കുന്നതിനും വളർച്ച പ്രോത്സാഹിപ്പിക്കുന്നതിനും ഉപഭോക്താക്കൾക്കും പങ്കാളികൾക്കും അവരുടെ വ്യാപനം വർധിപ്പിക്കുന്നതിനും പ്രത്യേക ഇടങ്ങൾ നൽകിക്കൊണ്ട് ഈ ഉത്സവം പിന്തുണയ്ക്കുന്നുണ്ട്.
ഫെസ്റ്റിവൽ സിഇഒ ഒമർ ബിൻ അബ്ദുൽ അസീസ് അൽ-ഹംവാൻ, അൽ-ജൗഫ് ഐക്കൺ എന്ന നിലയിൽ ഫെസ്റ്റിവലിന്റെ സ്ഥാപിത പദവി ചൂണ്ടിക്കാട്ടി. സ്പെയിൻ, ഇറ്റലി, തുർക്കി, ഈജിപ്ത്, ജോർദാൻ, സിറിയ, പലസ്തീൻ എന്നീ ഏഴ് രാജ്യങ്ങളുടെ പങ്കാളിത്തം ഈ വർഷം ഫെസ്റ്റിവലിന്റെ രാജ്യാന്തര ആകർഷണം പ്രകടമാണ്. ഈ വർഷത്തെ ഇവന്റിൽ 45 കർഷകരും അഞ്ച് കാർഷിക കമ്പനികളും ഉൾപ്പെടുന്നു.
