ദുബായ് : ദുബായ് രാജ്യാന്തര വിമാനത്താവളം (DXB) വേനൽക്കാല യാത്രാസീസണിലേക്കുള്ള തിരക്കിലേക്ക് കടക്കുകയാണ്. ജൂൺ 27 മുതൽ ജൂലൈ 9 വരെ 3.4 ദശലക്ഷത്തിലധികം യാത്രക്കാർ DXB വഴി യാത്ര ചെയ്യും എന്നാണ് അധികൃതർ പ്രതീക്ഷിക്കുന്നത്. പ്രതിദിനം ശരാശരി 2.65 ലക്ഷം യാത്രക്കാരാണ് എത്തുമെന്ന കണക്ക്. ജൂലൈ 5-നാണ് യാത്രക്കാർ ഏറ്റവും കൂടുതൽ ഉണ്ടാകാൻ സാധ്യതയുള്ളത്.
സംയോജിത പദ്ധതി തയ്യാറാക്കി
യാത്രക്കാരുടെ സുരക്ഷയും കാര്യക്ഷമതയും ഉറപ്പാക്കുന്നതിനായി ദുബായ് എയർപോർട്ട്സ് വിവിധ വകുപ്പുകളുമായി ചേർന്ന് ഒരു വേനൽക്കാല സന്നദ്ധതാ പദ്ധതി തയ്യാറാക്കിയിട്ടുണ്ട്. യാത്രാ സർവീസുകളുടെ തടസ്സരഹിത പ്രവർത്തനത്തിനായി തത്സമയ നിരീക്ഷണ സംവിധാനങ്ങളും പ്രവചന സംവിധാനങ്ങളും ഉപയോഗത്തിലാണ്.
സമയം പാലിച്ച് എത്തണമെന്ന് നിർദ്ദേശം
പ്രവാസികളും സന്ദർശകരും ഉൾപ്പെടെയുള്ള യാത്രക്കാർക്ക് വിമാനത്താവളത്തിലെ പരിശോധന നടപടികൾ നേരത്തേ പൂർത്തിയാക്കുന്നതിന് ഫ്ലൈറ്റ് സമയത്തിന് മുമ്പായി കുറഞ്ഞത് മൂന്ന് മണിക്കൂർ മുമ്പ് വിമാനത്താവളത്തിലെത്തണമെന്ന നിർദ്ദേശവും അധികൃതർ നൽകി.
വൈകലുകൾക്ക് സാധ്യത
പ്രദേശത്തെ കാലാവസ്ഥാ സാഹചര്യങ്ങളും മറ്റ് അന്താരാഷ്ട്ര മാനദണ്ഡങ്ങളും മൂലം ചില വിമാനങ്ങൾ റദ്ദാകാനോ വൈകാനോ സാധ്യതയുണ്ടെന്ന് അധികൃതർ അറിയിച്ചു. ഇത്തരക്കാർക്ക് ആവശ്യമായ പിന്തുണയും സേവനങ്ങളും നൽകുന്നതിനായി ഉദ്യോഗസ്ഥർ രാത്രിയും പകലും പ്രവർത്തിക്കുന്നതായി എയർപോർട്ട് അധികൃതർ അറിയിച്ചു.
