വിദേശത്ത് തടവിലായവരെ ഇന്ത്യന്‍ ജയിലിലേക്ക് മാറ്റാൻ നടപടി വേണം: ഇന്ത്യൻ പ്രവാസി മൂവ്മെന്റ്.

കോഴിക്കോട് : വിദേശത്ത് ജയിലുകളിൽ കഴിയുന്നവരെ ഇന്ത്യയിലെ ജയിലുകളിലേക്കു മാറ്റാൻ സർക്കാർ ഇടപെടണമെന്ന് ഇന്ത്യൻ പ്രവാസി മൂവ്മെന്റ്. വിദേശത്തെ ജയിലിലുള്ളവരെ ഇന്ത്യയിലെ ജയിലിലേക്കു മാറ്റാൻ സമ്മതിച്ചു കൊണ്ട് ഒട്ടേറെ രാജ്യങ്ങളുമായി ഉടമ്പടി ഉണ്ട്.വിദേശത്തെ വിവിധ ജയിലുകളിലായി പതിനായിരത്തോളം ഇന്ത്യക്കാരുണ്ട്. വർഷങ്ങളായി അവർ ജയിലിൽ കിടക്കുകയാണ്. പലരും ചതിയിൽ പെട്ടവരും നിരപരാധികളുമാണ്. ഇത്തരക്കാർക്കു കൃത്യമായി കാര്യങ്ങൾ ബോധിപ്പിക്കാൻ ഭാഷ അറിയാത്ത പ്രശ്നവും ഉണ്ട്.
ഇത്തരക്കാരെ ജയിൽ മോചിതരാക്കാൻ ലോകപര്യടനം നടത്താൻ കേന്ദ്രസർക്കാർ സംഘത്തെ നിയോഗിക്കണമെന്നാവശ്യപ്പെട്ടു ജയിലിൽ കഴിയുന്നവരുടെ ബന്ധുക്കൾ കേരളത്തിലെ ലോക്സഭാ, രാജ്യസഭാ അംഗങ്ങളെയും വിദേശകാര്യ മന്ത്രാലയം കമ്മിറ്റി ചെയർമാൻ ശശി തരൂർ എംപിയെയും ഡൽഹിയിൽ നേരിട്ടു സന്ദർശിച്ചു നിവേദനം നൽകിയതായി ഇന്ത്യൻ പ്രവാസി മൂവ്മെന്റ് പ്രസിഡന്റ് ആർ.ജെ.സജിത്ത് പറഞ്ഞു.