അബുദാബി ആസ്ഥാനമായി പ്രവർത്തിക്കുന്ന ലുലു ഗ്രൂപ്പ് ഇന്റർനാഷണല് യുഎഇയിലെ എല്ലാ സ്റ്റോറുകളിലും ഇന്ത്യയുടെ പേയ്മെന്റ് സംവിധാനമായ യൂണിഫൈഡ് പേയ്മെന്റ് ഇന്റർഫേസ് (യു പി ഐ) അവതരിപ്പിച്ചു
ഇന്ത്യ 78ാം സ്വാതന്ത്ര്യ ദിനം ആഘോഷിക്കുന്ന വേളയില് ഇന്ത്യൻ എംബസിയിലെ ഡെപ്യൂട്ടി ചീഫ് ഓഫ് മിഷൻ എ. അമർനാഥ് വ്യാഴാഴ്ച അബുദാബിയിലെ ലുലു ഹൈപ്പർമാർക്കറ്റില് ഉദ്ഘാടന ഇടപാട് നിർവഹിച്ചു.
ഇന്ത്യൻ പ്രവാസികള്ക്കും വിസിറ്റ് വിസയില് യുഎഇയില് എത്തുന്നവർക്കും റുപേ കാർഡ് ഉപയോഗിച്ച് ലുലുവിന്റെ എല്ലാ സ്റ്റോറുകളിലും പെയ്മെന്റ് നടത്താം. ഇതോടൊപ്പം ക്യൂആർ കോഡ് ഉപയോഗിച്ച് ഗൂഗിള് പേ, ഫോണ് പേ, പേടി എം എന്നീ ആപ്പുകളിലൂടെ യുപിഐ പേയ്മെന്റുകളും നടത്താവുന്നതാണ്. പുതിയ പേയ്മെന്റ് സൗകര്യം പ്രതിവർഷം യു എ ഇയിലേക്ക് എത്തുന്ന 10 ദശലക്ഷത്തിലധികം ഇന്ത്യക്കാർക്ക് വളരെയധികം പ്രയോജനം ചെയ്യും.ഒന്നിലധികം ബാങ്ക് അക്കൗണ്ടുകളെ ഒരൊറ്റ മൊബൈല് ആപ്ലിക്കേഷനായി ഏകീകരിക്കുന്ന ഒരു പേയ്മെന്റ് സംവിധാനമാണ് യുപിഐ. ഇക്കഴിഞ്ഞ ഫെബ്രുവരിയില് പ്രസിഡന്റ് ഷെയ്ഖ് മുഹമ്മദും ഇന്ത്യൻ പ്രധാനമന്ത്രി നരേന്ദ്ര മോദിയും ചേർന്ന് അബുദാബിയില് യുപിഐ റുപേ കാർഡ് സേവനം അവതരിപ്പിച്ചിരുന്നു. അതിനുശേഷം, ദുബായ് ആസ്ഥാനമായുള്ള മഷ്റഖ് ബാങ്കും അല് മായ സൂപ്പർമാർക്കറ്റുകളും യുപിഐ പേയ്മെന്റ് സംവിധാനങ്ങള് സ്വീകരിച്ചിരുന്നു.
