മസ്‌കത്ത് : റമസാനില്‍ തൊഴിലിടങ്ങളില്‍ ശ്രദ്ധിക്കേണ്ട കാര്യങ്ങളെ കുറിച്ച് ജീവനക്കാര്‍ക്കും തൊഴിലുടമകള്‍ക്കും മാര്‍ഗനിര്‍ദേശങ്ങള്‍ പുറത്തിറക്കി തൊഴില്‍ മന്ത്രാലയം. തൊഴിലിടങ്ങളിലെ സുരക്ഷ ഉറപ്പുവരുത്തുക, പരുക്കുകള്‍ ഒഴിവാക്കുക തുടങ്ങിയ ലക്ഷ്യങ്ങളിലാണ് മാര്‍ഗനിര്‍ദേശങ്ങള്‍ പുറത്തിറക്കിയിരിക്കുന്നത്.ജീവനക്കാര്‍ രാത്രിയില്‍ മതിയായ ഉറക്കം ലഭിക്കുന്നുവെന്ന് ഉറപ്പുവരുത്തണം. നാരുകള്‍ അടങ്ങിയ ഭക്ഷണങ്ങള്‍ കഴിക്കുകയും വേണം. ഇഫ്താര്‍ സമയം കഫീന്‍, പഞ്ചസാര എന്നിവ അടങ്ങിയ പാനീയങ്ങള്‍ ഒഴിവാക്കണം. നോമ്പില്ലാത്ത സമയങ്ങളില്‍ ജലാംശം നിലനിര്‍ത്താന്‍ ധാരണം വെള്ളം കുടിക്കുക. ജോലി സമയങ്ങളില്‍ എല്ലായ്‌പ്പോഴും വ്യക്തിഗത സംരക്ഷണ ഉപകരണങ്ങള്‍ ഉപയോഗിക്കണം. ആരോഗ്യസ്ഥിതികളെ കുറിച്ചും കഴിച്ചുകൊണ്ടിരിക്കുന്ന മരുന്നുകളെ കുറിച്ചും സൂപ്പര്‍വൈസര്‍മാരെ അറിയിക്കുക
തൊഴിലുടമ നോമ്പ് സമയങ്ങളില്‍ ജോലിക്ക് ഷിഫ്റ്റ് അനുവദിക്കണം. പുറം ജോലികളുടെ സമയം കുറയ്ക്കുകയും ജീവനക്കാരുടെ ശാരീരികക്ഷമത നിരീക്ഷിക്കുകയും ചെയ്യണം. പ്രഥമ ശുഷ്രൂയും അടിയന്തര ചികിത്സയും എളുപ്പത്തില്‍ ലഭ്യമാകുന്നതിനുള്ള സംവിധാനമൊരുക്കണം. ജോലി സ്ഥലത്തെ അപകടങ്ങളെ കുറിച്ചും ആവശ്യമായ മുന്‍കരുതല്‍-പ്രതിരോധ നടപടികളെ കുറിച്ചും ജീവനക്കാരെ ബോധവത്കരികരിക്കണം.ജീവനക്കാരുടെ മാനസികവും ശാരീരികവുമായ ക്ഷേമം ഉറപ്പുവരുത്തുന്നതിന് ജോലിസ്ഥലത്തെ സമ്മര്‍ദ്ദം കുറക്കുകയും ക്ഷീണത്തിന് സാധ്യതയുള്ള അനാവശ്യ യാത്രകള്‍ ഒഴിവാക്കുകയും ചെയ്യണം.
