മസ്‌കത്ത് : എ ഐ സാങ്കേതിക വിദ്യയും നൂതന റിമോര്‍ട്ട് സെന്‍സിങ്ങുമുള്ള തദ്ദേശീയമായി നിര്‍മിച്ച ആദ്യ ഉപഗ്രഹം വിക്ഷേപിച്ച് ഒമാൻ . ഇന്റര്‍നാഷനല്‍ ടെലികമ്യൂണിക്കേഷന്‍ ഓര്‍ഗനൈസേഷന്‍ സുല്‍ത്താനേറ്റിന്‍റെ പേരില്‍ റജിസ്റ്റര്‍ ചെയ്ത ഉപഗ്രഹമാണിത്. ഒ എല്‍-1 എന്ന പേരിലുള്ള ഉപഗ്രഹ വിക്ഷേപണത്തിന് പിന്നില്‍ ഒമാന്‍ ലെന്‍സ് എന്ന കമ്പനിയാണ്.
ഭൗമനിരീക്ഷണത്തിനുള്ള വിപുലമായ കഴിവുകള്‍ നല്‍കുന്നതിന് ലക്ഷ്യമിട്ടുള്ള ഉപഗ്രഹങ്ങളുടെ കൂട്ടത്തില്‍ ആദ്യത്തേത് എന്ന പ്രത്യേകതയും ഒ എല്‍-1ന് ഉണ്ട്. പരിസ്ഥിതി നിരീക്ഷണം, നഗരാസൂത്രണം, റിസോഴ്‌സ് മാനേജ്‌മെന്റ് എന്നിവയുള്‍പ്പെടെ ഒമാനിലെ നിരവധി മേഖലകളെ പിന്തുണക്കുന്നതില്‍ ഈ ഉപഗ്രഹം നിര്‍ണായക പങ്ക് വഹിക്കും.
ഒമാന്‍റെ പ്രകൃതിദത്തവും നഗരപരവുമായ പ്രകൃതിദൃശ്യങ്ങള്‍ നിരീക്ഷിക്കുന്നതിനും കൈകാര്യം ചെയ്യുന്നതിനും സഹായിക്കുന്ന മികച്ച ചിത്രങ്ങള്‍ നല്‍കുന്നതിന് എ ഐ അധിഷ്ഠിത ഡാറ്റാ വിശകലനം നടത്താന്‍ രൂപകല്‍പന ചെയ്തിരിക്കുന്ന ഉപഗ്രഹം ഗുണം ചെയ്യും. ബഹിരാകാശത്ത് നിന്ന് നേരിട്ട് ദ്രുത വിശകലനങ്ങള്‍ നല്‍കുന്നതിന് നിര്‍മിത ബുദ്ധി ഉപയോഗിക്കും. ഉപഗ്രഹം വിക്ഷേപണ മേഖലയില്‍ സുല്‍ത്താനേറ്റിന്‍റെ പുതിയ കുതിപ്പിനാണ് ഇവിടെ തുടക്കം കുറിക്കുന്നത്.
