ദുബൈ: യാത്രാരേഖ മാനേജ്മെന്റിലെ ദുബൈയുടെ ആധുനിക സംവിധാനങ്ങളും ഡിജിറ്റൽ പരിഷ്കാരങ്ങളും മനസ്സിലാക്കുന്നതിനായി ബഹ്റൈൻ ദേശീയത, പാസ്പോർട്ട്, റെസിഡൻസ് കാര്യങ്ങളുമായി ബന്ധപ്പെട്ട മന്ത്രാലയത്തിലെ ഉന്നതതല പ്രതിനിധി സംഘം ദുബൈ സന്ദർശിച്ചു.
ദുബൈ ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ് (GDRFA) മുഖേന നടന്ന സന്ദർശനം, പാസ്പോർട്ട് വിതരണം, പുതുക്കൽ, പ്രിന്റിംഗ് എന്നിവയുമായി ബന്ധപ്പെട്ട ഡിജിറ്റൽ സംവിധാനങ്ങൾ നേരിൽ കാണാനും പഠിക്കാനുമായിരുന്നു.
GDRFA ഡയറക്ടർ ജനറൽ ലഫ്. ജനറൽ മുഹമ്മദ് അഹ്മദ് അൽ മർറി, അസിസ്റ്റന്റ് ഡയറക്ടർ ജനറൽ മേജർ ജനറൽ ഉബൈദ് മുഹൈർ ബിൻ സുരൂർ എന്നിവരും ഉന്നത ഉദ്യോഗസ്ഥരും സംഘത്തെ സ്വീകരിച്ചു.
ബഹ്റൈൻ പാസ്പോർട്ട് ഡയറക്ടറേറ്റ് ഡയറക്ടർ മേജർ ശൈഖ് സൽമാൻ ബിൻ അഹ്മദ് അൽ ഖലീഫയുടെ നേതൃത്വത്തിലുള്ള സംഘം വിവിധ വിഭാഗങ്ങൾ സന്ദർശിച്ചു. ദുബൈ അന്താരാഷ്ട്ര വിമാനത്താവളത്തിലെ ടേർമിനൽ 3-ൽ പ്രവർത്തിക്കുന്ന എയർപോർട്ട് സർവീസ് ഓഫീസ് ഉൾപ്പെടെ, യാത്രാരേഖ അച്ചടിക്കുള്ള ഓഫിസുകൾ, നാഷണാലിറ്റി സെക്ടർ എന്നിവ സന്ദർശനത്തിൽ ഉൾപ്പെട്ടു.
“ഉയർന്നതോതിലുള്ള സേവന നിലവാരവും സാങ്കേതിക മുന്നേറ്റങ്ങളും പങ്കുവെക്കുന്നതിലൂടെ ഗൾഫ് മേഖലയിൽ സഹകരണം കൂടുതൽ ശക്തമാകുകയാണ് ലക്ഷ്യം,” എന്ന് ലഫ്. ജനറൽ അൽ മർറി വ്യക്തമാക്കി.
സർക്കാർ സംവിധാനങ്ങൾ തമ്മിലുള്ള ബന്ധം ശക്തിപ്പെടുത്താനും മികച്ച പ്രവർത്തന രീതികൾ പങ്കുവെക്കുന്നതിനുമുള്ള ശ്രമങ്ങളുടെ ഭാഗമായാണ് സന്ദർശനം, ഇരു രാജ്യങ്ങളുടെയും ഉദ്യോഗസ്ഥർ അഭിപ്രായപ്പെട്ടു.
