മസ്കത്ത് ∙ ഒമാനി റിയാലിന്റെ ഔദ്യോഗിക ചിഹ്നമെന്ന പേരിൽ സമൂഹമാധ്യമങ്ങളിൽ തെറ്റായ ചിഹ്നം പ്രചരിപ്പിക്കപ്പെടുന്ന പശ്ചാത്തലത്തിൽ, പൊതുജനങ്ങൾക്ക് ജാഗ്രതാ നിർദ്ദേശവുമായി സെൻട്രൽ ബാങ്ക് ഓഫ് ഒമാൻ (CBO) മുന്നണിയിലെത്തി.
‘ഒമാനി റിയാലിന്റെ ചിഹ്നം’ എന്ന വ്യാഖ്യാനത്തിൽ പ്രചരിപ്പിക്കപ്പെടുന്ന ചില ചിഹ്നങ്ങൾ ബാങ്കിന്റെ അംഗീകാരം ലഭിക്കാത്തതും നിയമവിരുദ്ധവുമായതും ആണെന്ന് ബാങ്ക് ഔദ്യോഗികമായി വ്യക്തമാക്കി. ഒമാനി റിയാലിനെ പ്രതിനിധാനം ചെയ്യുന്നതായി തെറ്റായി വിശ്വസിക്കപ്പെടുന്ന ചിഹ്നങ്ങൾ പരക്കെ പ്രചരിക്കുന്നതിൽ ആശങ്ക പ്രകടിപ്പിച്ച സെൻട്രൽ ബാങ്ക്, ഇതിനെതിരെ അടിയന്തര വിശദീകരണവും മുന്നറിയിപ്പും പുറപ്പെടുവിച്ചു.
തെറ്റായ ചിഹ്നം പ്രചരിപ്പിക്കുക, പ്രോത്സാഹിപ്പിക്കുക, പങ്കിടുക എന്നിവയെല്ലാം നിയമവിരുദ്ധമാണ് എന്ന് വ്യക്തമാക്കിയ ബാങ്ക്, ഇത്തരം പ്രവർത്തനങ്ങളിൽ നിന്ന് കൈവാങ്ങണമെന്ന് അഭ്യർത്ഥിച്ചു. അവിടത്തെ പൗരന്മാരോടും താമസക്കാരോടും ഉത്തരവാദിത്വത്തോടെയും ജാഗ്രതയോടെയും പ്രവർത്തിക്കാനും, സ്ഥിരീകരിക്കാത്ത വിവരങ്ങൾ പ്രചരിപ്പിക്കുന്നത് ഒഴിവാക്കാനും സെൻട്രൽ ബാങ്ക് ആഹ്വാനം ചെയ്തു.
