അവധി ആഘോഷത്തിന് പോയ കുടുംബങ്ങള്‍ സഞ്ചരിച്ചിരുന്ന
വാഹനം അപകടത്തില്‍പ്പെട്ടാണ് അപകടം.
മസ്‌കത്ത് : അബുദാബിയില്‍ നിന്ന് സലാലയിലേക്ക് കുടുംബ സമേതം അവധി ആഘോഷത്തിന് പോയവരുടെ സംഘം സഞ്ചരിച്ചിരുന്ന വാഹനം മറിഞ്ഞുണ്ടായ അപകടത്തില്‍ സ്ത്രീ മരിച്ചു. ഏഴ് പേര്‍ക്ക് പരിക്കേറ്റു.
ആലപ്പുഴ കായംകുളം ചേപ്പാട് സ്വദേശിനിയും അബുദാബിയില്‍ നേഴ്‌സുമായ ഷേബ (33) യാണ് മരിച്ചത്. ഷേബയുടെ ഭര്‍ത്താവ് രാജി സജിമോന്‍, മക്കളായ എവിലിന്‍, എഡ്വിന്‍, ഓച്ചിറ സ്വദേശി ബെന്‍സിക്കുമാണ് സാരമായി പരിക്കേറ്റത്.
ദുബായിയില്‍ നിന്ന് ഈദ് അവധി ആഘോഷിക്കാന്‍ സലാലയിലേക്ക് പോകുന്ന വഴി ഞായറാഴ്ചയായിരുന്നു അപകടം. ഇവര്‍ സഞ്ചരിച്ചിരുന്ന വാഹനം ഹൈമയ്ക്ക് സമീപം മറിയുകയായിരുന്നു. അല്‍ വുസ്ത ഗവര്‍ണറേറ്റ് പോലീസ് സംഭവ സ്ഥലത്ത് എത്തി പരിക്കേറ്റവരെ ഉടന്‍ ആശുപത്രിയിലെത്തിച്ചുവെങ്കിലും ഷേബയുടെ ജീവന്‍ രക്ഷിക്കാനായില്ല.
നഴ്‌സിംഗ് പഠന കാലം മുതല്‍ സുഹൃത്തുക്കളായിരുന്ന ഷേബയും ബെന്‍സിയും ഇരുവരുടേയും കുടുംബം ഒരുമിച്ചാണ് അവധി ആഘോഷിക്കാന്‍ സലാലയിലേക്ക് പോയത്.
ഇരുവരും അബുദാബിയിലെ സ്വകാര്യ ക്ലിനിക്കില്‍ നഴ്‌സായി ജോലി ചെയ്യുകയാണ് . ഷേബയുടെ സഹോദരന്‍ മാത്യൂസ് താമസിക്കുന്നത് സലാലയിലാണ്. മാത്യൂസിന്റെ കൂടെ അവധി ആഘോഷിക്കാനുള്ള ഒരുക്കത്തിലായിരുന്നു ഷേബ.
ഹൈമ ആശുപത്രിയില്‍ സൂക്ഷിച്ചിരിക്കുന്ന മൃതദേഹം പോസ്റ്റുമാര്‍ട്ടവും അനന്തര നടപടികള്‍ക്കും ശേഷം മസ്‌കത്തിലെത്തിക്കും തുടര്‍ന്ന് സ്വദേശമായ ആലപ്പുഴയ്ക്ക് കൊണ്ടുപോകും
