അബുദാബി : ആഗോള ഊർജ സുരക്ഷ വർധിപ്പിക്കുന്നതു സംബന്ധിച്ച് ചർച്ച ചെയ്യാൻ യുഎസ് ഊർജ സെക്രട്ടറി ക്രിസ് റൈറ്റ് വൈകാതെ യുഎഇയിലെത്തും അമേരിക്കയിൽ യുഎഇയുടെ നിക്ഷേപ പദ്ധതികളെക്കുറിച്ചുള്ള തുടർ ചർച്ചകളുണ്ടാകും. അബുദാബി ഉപഭരണാധികാരിയും ദേശീയ സുരക്ഷാ ഉപദേഷ്ടാവുമായ ഷെയ്ഖ് തഹ്നൂൻ ബിൻ സായിദിന്റെ നേതൃത്വത്തിലുള്ള യുഎഇ പ്രതിനിധി സംഘം കഴിഞ്ഞ മാസം വാഷിങ്ടൻ സന്ദർശിച്ചതിനു പിന്നാലെയാണ് റൈറ്റിന്റെ വരവ്. ഉഭയകക്ഷി ബന്ധം, പ്രത്യേകിച്ച് ഊർജം, അടിസ്ഥാന സൗകര്യങ്ങൾ, ഉൽപാദനം, നിർമിതബുദ്ധി തുടങ്ങി വിവിധ മേഖലകളിലെ സഹകരണം ശക്തിപ്പെടുത്തുകയാണ് ലക്ഷ്യം.യുഎഇ ഊർജ മന്ത്രി സുഹൈൽ അൽ മസ്റൂഇ, വ്യവസായ, നൂതനസാങ്കേതിക മന്ത്രിയും അബുദാബി നാഷനൽ ഓയിൽ കമ്പനി (അഡ്നോക്) എംഡിയും ഗ്രൂപ്പ് സിഇഒയുമായ സുൽത്താൻ അൽ ജാബിർ എന്നിവരുമായി റൈറ്റ് കൂടിക്കാഴ്ച നടത്തും. കൂടാതെ, ആർട്ടിഫിഷ്യൽ ഇന്റലിജൻസ് നിക്ഷേപകനായ എംജിഎക്സ്, ന്യൂക്ലിയർ എനർജി കമ്പനിയായ ഇഎൻഇസി, സോവറിൻ വെൽത്ത് ഫണ്ടുകളായ മുബദല, എഡിക്യു എന്നിവ ഉൾപ്പെടെയുള്ള ഇമറാത്തി സ്ഥാപനങ്ങളിൽ നിന്നുള്ള പ്രതിനിധികളുമായും യുഎസ് ഊർജ സെക്രട്ടറി കൂടിക്കാഴ്ച നടത്തും.
