അബുദാബി : വേനൽക്കാലത്തിന് തുടക്കമായി യുഎഇയിലേക്ക് സന്ദർശകരുടെ ഒഴുക്ക് ഗണ്യമായി വർധിച്ചിരിക്കുന്ന പശ്ചാത്തലത്തിൽ, സന്ദർശക വിസയിൽ രാജ്യത്തെത്തുന്നവർക്കായി അതോറിറ്റികൾ കർശന മുന്നറിയിപ്പ് നൽകി.
വിസ കാലാവധി കഴിഞ്ഞിട്ടും രാജ്യത്ത് തുടരുന്നത് വലിയ സാമ്പത്തിക ബാധ്യതകൾക്കും നിയമ നടപടികൾക്കും ഇടയാക്കുമെന്ന് അധികൃതർ അറിയിച്ചു. കാലാവധി കഴിഞ്ഞ് ഓരോ ദിവസവും രാജ്യത്ത് തങ്ങുന്നതിനായി കനത്ത പിഴ ഈടാക്കപ്പെടുന്നുവെന്നും ഈ പിഴ തുക കണക്കിലെടുത്താൽ അതീവ ഗൗരവമുള്ള സാഹചര്യങ്ങളിലേക്ക് കാരണമാകാമെന്നും അവർ വ്യക്തമാക്കി.
വിസ കാലാവധി തീരുന്നതിന് മുൻപ് തന്നെ രാജ്യം വിട്ടുകയോ, വിസ സ്റ്റാറ്റസ് പുതുക്കുകയോ ചെയ്യുന്നത് അനിവാര്യമാണെന്ന് അധികൃതർ വ്യക്തമാക്കി. ഇത്തരത്തിൽ നിയമലംഘനങ്ങൾ ഉണ്ടാകുകയാണെങ്കിൽ, ഭാവിയിൽ യുഎഇയിൽ പ്രവേശനം തടസ്സപ്പെടാൻ സാധ്യതയുണ്ടെന്നും, നിയമ നടപടികൾ നേരിടേണ്ടിവരുമെന്നും മുന്നറിയിപ്പ് നൽകി.
വിസ പുതുക്കൽ/മാറ്റവുമായി ബന്ധപ്പെട്ട സഹായങ്ങൾക്കായി അംഗീകൃത ഏജൻസികളെയോ ഔദ്യോഗിക സേവനകേന്ദ്രങ്ങളെയോ മാത്രം സമീപിക്കണം. അനധികൃത ഏജൻസികൾ വഴി ഇടപഴകുന്നതിന് പിന്നാലെ ഉണ്ടാകുന്ന നിയമപ്രശ്നങ്ങൾക്കും സാമ്പത്തിക നഷ്ടങ്ങൾക്കും വ്യക്തികൾക്കുതന്നെ ഉത്തരവാദിത്വം വഹിക്കേണ്ടിവരുമെന്നും അതോറിറ്റികൾ ഓർമ്മിപ്പിച്ചു.
വേനൽ അവധിക്കാലത്ത് കുടുംബാംഗങ്ങളെ സന്ദർശിക്കാനോ വിനോദസഞ്ചാരത്തിനോ നിരവധി പേർ യുഎഇയിലേക്കെത്താറുണ്ട്. ഇതേ സമയം, ചിലർക്ക് വിസ കാലാവധിയും എക്സ്റ്റെൻഷൻ നടപടിക്രമങ്ങളും സംബന്ധിച്ച് വ്യക്തമല്ല, ഇതോടെ അനധികൃത താമസ സാധ്യത ഉയരുന്നുണ്ട്. അതിനാലാണ് ഇപ്പോഴത്തെ മുന്നറിയിപ്പ് വ്യക്തമായും പ്രാധാന്യത്തോടെയും നൽകുന്നതെന്ന് അധികൃതർ വ്യക്തമാക്കി.
സന്ദർശകർ വിസ കാലാവധി കൃത്യമായി മനസ്സിലാക്കുകയും, പാസ്പോർട്ടിലുള്ള സ്റ്റാംപിലോ ഇ-വിസയിലോ രേഖപ്പെടുത്തിയ തീയ്യതികൾ ശ്രദ്ധയോടെ പരിശോധിക്കുകയും വേണം. കാലാവധി തീരുന്നതിന് മുമ്പ് യാത്രയ്ക്കുള്ള ഒരുക്കങ്ങൾ ചെയ്യുക. ദീർഘകാലം യുഎഇയിൽ തുടരണമെങ്കിൽ, താമസ വീസയിലേക്ക് മാറുന്നതിനുള്ള നടപടികൾ സമയബന്ധിതമായി ആരംഭിക്കണമെന്നും അധികൃതർ നിർദ്ദേശിച്ചു.
വിസ സംബന്ധമായ കാര്യങ്ങൾക്ക് GDRFA, ICP തുടങ്ങിയ ഔദ്യോഗിക വെബ്സൈറ്റുകൾ ഉപയോഗിക്കുക. സന്ദർശകർ യുഎഇയിലെ നിയമങ്ങൾ പൂർണ്ണമായി പാലിക്കണമെന്നുമാണ് അധികൃതരുടെ ആവശ്യം.
