സൗമിത്ര ചാറ്റര്‍ജിയുടെ നിര്യാണത്തില്‍ അനുശോചിച്ച് രാഷ്ട്രപതിയും പ്രധാനമന്ത്രിയും

ന്യൂഡല്‍ഹി: ഇതിഹാസ ബംഗാളി നടന്‍ സൗമിത്ര ചാറ്റര്‍ജിയുടെ നിര്യാണത്തില്‍ അനുശോചനം രേഖപ്പെടുത്തി രാഷ്ട്രപതി രാംനാഥ് കോവിന്ദും പ്രധാനമന്ത്രി നരേന്ദ്രമോദിയും.

“സൗമിത്ര ചാറ്റര്‍ജി വിടപറഞ്ഞതോടെ ഇന്ത്യന്‍ സിനിമയിലെ ഇതിഹാസങ്ങളിലൊന്ന് നഷ്ടപ്പെട്ടു. അപു ത്രയത്തിലൂടെയും സത്യജിത് റേയുടെ മറ്റ് സിനിമകളിലൂടെയും അദ്ദേഹം എല്ലാവരുടെയും ഓര്‍മകളില്‍ എന്നും ഉണ്ടാകും.അഭിനയരംഗത്ത് അദ്ദേഹം നല്‍കിയ സംഭാവനകള്‍ വലുതാണ്. ദാദാ ഫാല്‍ക്കെ പുരസ്‌കാരം, പത്മ ഭൂഷണ്‍ തുടങ്ങി നിരവധി പുരസ്‌കാരങ്ങള്‍ സ്വന്തമാക്കിയ വ്യക്തിയാണ് സൗമിത്ര ചാറ്റര്‍ജി. അദ്ദേഹത്തിന്റെ കുടുംബത്തിനും ലോകത്തുള്ള അദ്ദേഹത്തിന്റെ ലക്ഷക്കണക്കിനുള്ള ആരാധകര്‍ക്കും അനുശോചനം അറിയിക്കുന്നു.”-രാഷ്ട്രപതി ട്വിറ്ററില്‍ കുറിച്ചു.

‘ശ്രീ. സൗമിത്ര ചാറ്റര്‍ജിയുടെ നിര്യാണം ലോക സിനിമയ്ക്കും ഇന്ത്യയുടെയും ബംഗാളിന്റെയും സംസ്‌കാരിക ജീവിതത്തിനും കനത്ത നഷ്ടമാണ്. തന്റെ സൃഷ്ടികളിലൂടെ അദ്ദേഹം ബംഗാളി ഭാവുകത്വങ്ങള്‍, വികാരങ്ങള്‍, ധര്‍മ്മ ചിന്തകള്‍ എന്നിവയുടെ മൂര്‍ത്തീഭാവമായി. അദ്ദേഹത്തിന്റെ വിയോഗം വേദനിപ്പിക്കുന്നു. അദ്ദേഹത്തിന്റെ കുടുംബത്തിനും ആരാധകര്‍ക്കും അനുശോചനങ്ങള്‍. ഓം ശാന്തി’,- പ്രധാനമന്ത്രി പറഞ്ഞു.

സിനിമാ രാഷ്ട്രീയ രംഗത്തെ നിരവധിപ്പേര്‍ സൗമിത്ര ചാറ്റര്‍ജിക്ക് സോഷ്യല്‍മീഡിയയിലൂടെ ആദരാഞ്ജലികള്‍ അര്‍പ്പിച്ചു.