മലയാള ഭാഷാ–വിദ്യാഭ്യാസ രംഗത്തെ സമഗ്ര സംഭാവനകൾക്ക് ബിനു കെ. സാമിന് ആർ.എം.എ കേരളീയം പുരസ്‌കാരം

മസ്കത്ത്: സാമൂഹിക, സാംസ്‌കാരിക, വിദ്യാഭ്യാസ, ജീവകാരുണ്യ മേഖലകളിൽ ശ്രദ്ധേയമായ സംഭാവനകൾ നൽകുന്ന വ്യക്തിത്വങ്ങളെ ആദരിക്കുന്നതിനായി റൂവി മലയാളി അസോസിയേഷൻ (RMA) എല്ലാ വർഷവും നൽകി വരുന്ന ‘ആർ.എം.എ കേരളീയം’ പുരസ്‌കാരം ഈ വർഷം മലയാള ഭാഷാ–വിദ്യാഭ്യാസ രംഗത്തെ സമഗ്ര സംഭാവനകൾ പരിഗണിച്ച് ബിനു കെ. സാമിന് നൽകാൻ തീരുമാനിച്ചു.

മികച്ച ഭാഷാപഠന ഗ്രന്ഥത്തിനുള്ള പുരസ്‌കാരത്തിന് ബിനു കെ. സാമിന്റെ ‘നിപ്രസം ഉപ്രസം ആ’ എന്ന കൃതിയാണ് അർഹമായത്. 25,000 രൂപയും പ്രശസ്തിപത്രവും ഫലകവും അടങ്ങുന്നതാണ് പുരസ്‌കാരം.

മലയാളത്തിലെ സങ്കീർണ്ണമായ വ്യാകരണപാഠങ്ങളെ ലളിതമായ കഥകളിലൂടെ വായനക്കാർക്ക് പകർന്നുനൽകുന്നതാണ് ഈ ഗ്രന്ഥത്തിന്റെ പ്രത്യേകത. മലയാള മനോരമ ദിനപത്രത്തിലെ ‘പഠിപ്പുര’ പംക്തിയിൽ ബിനു കെ. സാം കൈകാര്യം ചെയ്തിരുന്ന വ്യാകരണ ലേഖനങ്ങളുടെ സമാഹാരമാണിത്. സാഹിത്യ പ്രവർത്തക സഹകരണ സംഘമാണ് പുസ്തകം പ്രസിദ്ധീകരിച്ചിരിക്കുന്നത്.

ഭാഷാപഠനത്തിനായി നൂതനമായ വിദ്യകൾ ആവിഷ്കരിക്കുന്നതിൽ ശ്രദ്ധേയനായ ബിനു കെ. സാം മലയാളത്തിലെ പ്രമുഖ എഴുത്തുകാർ, കടങ്കഥകൾ, ശൈലികൾ, പര്യായപദങ്ങൾ എന്നിവ ഉൾപ്പെടുത്തി തയ്യാറാക്കിയ 250 അക്ഷരച്ചീട്ടുകൾ അടങ്ങിയ ഭാഷാക്കളി ഏറെ ജനശ്രദ്ധ നേടിയിരുന്നു. കേരള സർക്കാരിന്റെ മലയാളം മിഷന്റെ പ്രഥമ രാജ്യാന്തര അദ്ധ്യാപക പരിശീലകനായ ഇദ്ദേഹം സംസ്ഥാന പാഠപുസ്തക സമിതിയംഗം കൂടിയാണ്. കുട്ടികളുടെ സാംസ്കാരിക്കൂട്ടമായ നന്മയുടെ സ്ഥാപക ഡയറക്ടർ കൂടിയായ ഇദ്ദേഹം വിവിധ സാമൂഹിക-സാംസ്കാരിക- വിദ്യാഭ്യാസ-സേവന പ്രവർത്തനങ്ങളിലൂടെ ഏറെ ശ്രദ്ധേയനാണ്. 75 തവണ സന്നദ്ധ രക്തദാനം നടത്തിയിട്ടുള്ള ബിനു കെ. സാം സംസ്ഥാന സർക്കാരിന്റെ 2001-ലെ മികച്ച രക്തദാതാവിനുള്ള പുരസ്കാര ജേതാവ് കൂടിയാണ്. പഠനപ്രവർത്തനത്തിന്റെ ഭാഗമായി ഇദ്ദേഹം തയ്യാറാക്കിയ നാല് ഹ്രസ്വചിത്രങ്ങളും, റോഡുസുരക്ഷ വഴികാട്ടി പാമ്പും കോണി കളിക്കളവും ഏറെ ശ്രദ്ധേയമായവയാണ്.

കുട്ടികളുടെ സമഗ്ര വ്യക്തിത്വ വികസനം ലക്ഷ്യമിട്ട് ക്ലാസ് 2 മുതൽ ക്ലാസ് 9 വരെയുള്ള കുട്ടികൾക്കായി റൂവി മലയാളി അസോസിയേഷൻ സംഘടിപ്പിക്കുന്ന ആർ എം എ ലിറ്റൽ ചാംപ്സ് ക്യാമ്പ് – 2026 ൽ പ്രത്യേക അതിഥിയായി പങ്കെടുക്കുന്ന ബിനു കെ. സാം സാറിന്, അദ്ദേഹത്തിന്റെ സമഗ്ര വിദ്യാഭ്യാസ–സാമൂഹിക സംഭാവനകളെ മാനിച്ചാണ് ആർ.എം.എ കേരളീയം പുരസ്‌കാരം സമ്മാനിക്കുന്നത്.

ജൂലൈ 10 വെള്ളിയാഴ്ച റൂവിയിലെ ഗോൾഡൻ തുലിപ് ഹെഡിംഗ്ടൺ ഹോട്ടലിൽ നടക്കുന്ന ചടങ്ങിലാണ് പുരസ്‌കാര സമർപ്പണം.

റൂവി മലയാളി അസോസിയേഷൻ പ്രസിഡന്റ് ഫൈസൽ ആലുവ, സെക്രട്ടറി ഡോ. മുജീബ് അഹമ്മദ് പത്തനംതിട്ട, ട്രഷറർ സുജിത് പത്മകുമാർ എന്നിവർ വാർത്താക്കുറിപ്പിൽ അറിയിച്ചു.