മലയാളത്തിന്റെ വാനമ്പാടിയ്ക്ക് പിറന്നാള്‍ ആശംസകള്‍

ഇന്ന് അന്‍പത്തേഴാം പിറന്നാള്‍ ആഘോഷിക്കുകയാണ് മലയാളത്തിന്റെ പ്രിയ ഗായിക കെ.എസ്.ചിത്ര. മലയാളത്തില്‍ പകരം വെക്കാനില്ലാത്ത സംഗീത വിസ്മയം. 1979 മുതല്‍ മലയാള സിനിമയിലൂടെ നിറസാന്നിധ്യം. ഇതുവരെ 25,000 നു മുകളില്‍ പാട്ടുകള്‍ പാടി മലയാളികളെ വിസ്‍മയിപ്പിച്ചു കൊണ്ടിരിക്കുകയാണ് മലയാളികളുടെ പ്രിയ ഗായികയായ ചിത്ര.

ആറ് തവണ ഇന്ത്യന്‍ദേശീയ പുരസ്കാരം. പതിനാറ് തവണ കേരളാ സംസ്ഥാന പുരസ്കാരം. പതിനാറ് തവണ മറ്റു സംസ്ഥാന പുരസ്ക്കാരം.കാലത്തിനു പകര്‍ത്തിയെഴുതാനാവാത്ത പ്രതിഭ. നാല്‍പ്പത്തൊന്ന് വര്‍ഷത്തെ സംഗീത യാത്രയ്ക്ക് ഇന്ന് അന്‍പത്തിയേഴാം വയസ്സ്.

1979-ല്‍ എംജി രാധാകൃഷ്ണന്‍ സംഗീത സംവിധാനം നിര്‍വഹിച്ച അട്ടഹാസം എന്ന ചിത്രത്തിലൂടെയായിരുന്നു മലയാള സിനിമയിലേക്ക് ചിത്ര എന്ന കലാകാരിയെ ലഭിച്ചത്. എന്നാല്‍ നവംബറിന്റെ നഷ്ട്ടം എന്ന ചിത്രത്തിലെ ‘അരികിലോ അകലെയോ’ എന്ന ഗാനം ഏറെ ശ്രദ്ധിക്കപ്പെടുകയും പ്രശംസിക്കപ്പെടുകയും ചെയ്തു. കൂടാതെ 1983 ല്‍ പുറത്തിറങ്ങിയ മാമാട്ടിക്കുട്ടി അമ്മയിലെ ‘ആളൊരുങ്ങി അരങ്ങൊരുങ്ങി’ എന്ന ഗാനം ഹിറ്റായതോടെ ചിത്രയെ തേടി പല ഭാഷകളില്‍ നിന്നും അവസരങ്ങള്‍ തേടി എത്തി.തമിഴില്‍ ഇളയരാജ സംഗീത സംവിധാനം നിര്‍വഹിച്ച ‘നീ താനേ അന്ന കുയില്‍’എന്ന സിനിമയില്‍ പാടാന്‍ അവസരം ലഭിച്ചതോടെ ദക്ഷിണേന്ത്യന്‍ ഗാന രംഗത്തും ചിത്ര ചുവടുറപ്പിച്ചു.

മലയാളം, തമിഴ്, തെലുഗ്, കന്നഡ, ഒറിയ, ഹിന്ദി, ബംഗാളി, അസാമിസ് തുടങ്ങി വിവിധ ഭാഷകളിലായി 1500 ഓളം ചലച്ചിത്രങ്ങളില്‍ ചിത്ര പാടി.