ബിജെപിക്കുവേണ്ടി പാര്‍ട്ടി വിടാന്‍ ഉദ്ദേശമില്ല; ആവര്‍ത്തിച്ച് സച്ചിന്‍ പക്ഷം

ജയ്പൂര്‍: രാജസ്ഥാനില്‍ നിയമസഭാ സമ്മേളനം നടക്കാനിരിക്കെ കോണ്‍ഗ്രസ് വിടാന്‍ ഉദ്ദേശമില്ലെന്ന് വീണ്ടും ഉറപ്പിച്ച് പറഞ്ഞ് സച്ചിന്‍ പക്ഷം. പാര്‍ട്ടിയില്‍ നിന്ന് പുറത്തു പോയെങ്കിലും തങ്ങള്‍ പാര്‍ട്ടിവിടാന്‍ ഉദ്ദേശിക്കുന്നില്ലെന്ന് സച്ചിന്‍ പൈലറ്റും മറ്റ് എംഎല്‍എമാരും നേരത്തെ വ്യക്തമാക്കിയിരുന്നു.

സച്ചിന്‍ പൈലറ്റിന്റെ വിശ്വസ്തനും ലഡ്‌നുവില്‍ നിന്നുള്ള എംഎല്‍എയുമായ മുകേഷ് ഭക്കറാണ് പാര്‍ട്ടി വിടില്ലെന്ന കാര്യം വ്യക്തമാക്കി രംഗത്തെത്തിയത്. താന്‍ പ്രത്യയ ശാസ്ത്രത്തില്‍ വിശ്വസിക്കുന്നുവെന്നും ബിജെപിക്കുവേണ്ടി പാര്‍ട്ടി വിടില്ലെന്നും ഒരു ദേശീയ മാധ്യമത്തോട് അദ്ദേഹം പറഞ്ഞു.

അതേസമയം കോണ്‍ഗ്രസ് വിപ്പ് നല്‍കിയാല്‍ ആഗസ്റ്റ് 14ന് നടക്കാന്‍ പോകുന്ന നിയമസഭാ സമ്മേളനത്തില്‍ പങ്കെടുക്കുമെന്ന് സച്ചിന്‍ പക്ഷക്കാരനായ മറ്റൊരു വിമത എം.എല്‍.എ പറഞ്ഞിരുന്നു. ബിജെപിയിലേക്ക് പോകാനാണ് സച്ചിനും കൂട്ടാളികളും കോണ്‍ഗ്രസ് വിട്ട് പുറത്തു പോയതെന്ന് നേരത്തെ തന്നെ അഭ്യൂഹങ്ങളും ആരോപണങ്ങളും ഉയര്‍ന്നിരുന്നു