യു.എ.ഇ യില്‍ ബുധനാഴ്ച മുതല്‍ ആരാധനാലയങ്ങള്‍ തുറക്കും

Web Desk

യുഎഇയില്‍ ജൂലൈ ഒന്ന് മുതല്‍ മസ്ജിദുകളും, മറ്റു ആരാധനാലയങ്ങളും തുറക്കുമെന്ന് ദേശീയ ദുരന്ത നിവാരണ മാനേജ്മെന്‍റ് അതോറിറ്റി വക്താവ് ഡോ. സൈഫ് അല്‍ ദാഹിരി അറിയിച്ചു. കോവിഡ് 19 സുരക്ഷാ മാനദണ്ഡങ്ങള്‍ പാലിച്ച് 30 ശതമാനം പേരെ ഉള്‍ക്കൊണ്ടായിരിക്കും മസ്ജിദുകള്‍ നമസ്‌കാരത്തിന് തുറന്നു കൊടുക്കുകയെന്നും അദ്ദേഹം മാധ്യമ സമ്മേളനത്തില്‍ വ്യക്തമാക്കി. എന്നാല്‍, മറ്റൊരറിയിപ്പുണ്ടാകുന്നതു വരെ ജുമുഅ നമസ്‌കാരം പള്ളികളില്‍ ഉടന്‍ ഉണ്ടാവില്ല. ഇമാമുമാര്‍ക്കും, മസ്ജിദ് ജീവനക്കാര്‍ക്കും യു.എ.ഇ ആരോഗ്യ വിഭാഗം കോവിഡ് ടെസ്റ്റ് നടത്തി നെഗറ്റീവ് ഫലം ഉറപ്പാക്കും.അതേസമയം, മുഴുവന്‍ പള്ളികളും സാധാരണ നമസ്‌കാരത്തിന് തുറക്കില്ലെന്നും അദ്ദേഹം പറഞ്ഞു. പാര്‍ക്കുകള്‍, ഷോപ്പിംഗ് മാളുകള്‍, വ്യവസായ-വാണിജ്യ-തൊഴില്‍ മേഖലകള്‍ എന്നിവിടങ്ങളിലെ നമസ്‌കാര ഹാളുകള്‍ അടഞ്ഞു തന്നെ കിടക്കും.

നിര്‍ദ്ദേശങ്ങള്‍:

1.പള്ളിയില്‍ പ്രവേശിക്കുന്ന ഓരോരുത്തരും 3 മീറ്റര്‍ വിട്ടു നില്‍ക്കണം.
2 മാസ്‌ക് നിര്‍ബന്ധമായും ധരിച്ചിരിക്കണം.
3.ഹസ്തദാനം ഒഴിവാക്കണം.
4.വുളുഅ് വീട്ടില്‍ നിന്ന് ചെയ്യണം.
5.വിശുദ്ധ ഖുര്‍ആന്‍ പാരായണം ചെയ്യാന്‍ സ്വന്തം കോപ്പികള്‍ കൊണ്ടുവരണം.
6.അല്‍ ഹോസ്ന്‍ ട്രേസിങ് ആപ്ലിക്കേഷന്‍ ഡൗണ്‍ലോഡ് ചെയ്ത് ആക്ടിവേറ്റ് ചെയ്യണം.
7.12 വയസ്സിന് താഴെയുള്ള കുട്ടികള്‍ക്കും, വൃദ്ധര്‍ക്കും പ്രവേശനമില്ല.