തൊഴില്‍ വിസയ്ക്ക് വിലക്കേര്‍പ്പെടുത്തി അമേരിക്ക; ഉത്തരവില്‍ ഒപ്പുവച്ച് ട്രംപ്

Web Desk

വാഷിങ്ടണ്‍ ഡിസി: കോവിഡ് വ്യാപനത്തെ തുടര്‍ന്ന് അമേരിക്കയിലേക്കുള്ള തൊഴില്‍ വിസകള്‍ നിയന്ത്രിക്കാനുള്ള ഉത്തരവില്‍ പ്രസിഡന്‍റ് ഡൊണാള്‍ഡ് ട്രംപ് ഒപ്പുവച്ചു. ഈ വര്‍ഷം അവസാനം വരെയാണ് നിയന്ത്രണം. എച്ച്1ബി,എച്ച് 2ബി, എല്‍ 1, ജെ 1 തുടങ്ങിയ വിസകളാണ് താല്‍ക്കാലികമായി നിര്‍ത്തി വയ്ക്കുന്നത്. ഐ.ടി പ്രൊഫഷണലുകള്‍ മുതല്‍ നിലവില്‍ വിസയുള്ളവരുടെ ഉറ്റബന്ധുക്കള്‍ക്ക് വരെ വിസ തടയുന്നതാണ് ഉത്തരവ്. അതേസമയം ഭക്ഷ്യ സംസ്‌കരണ മേഖലയിലുള്ളവര്‍ക്കും സര്‍വകലാശാല അധ്യാപകര്‍ക്കും വിസ ലഭിക്കും.

കോവിഡ് വ്യാപനത്തെ തുടര്‍ന്ന് എച്ച്1ബി വിസയില്‍ ജോലിചെയ്തിരുന്ന ഒട്ടേറെ ഇന്ത്യക്കാര്‍ ജോലി നഷ്ടപ്പെട്ട് നാട്ടിലേക്ക് മടങ്ങിയിരുന്നു. നിയന്ത്രണം പിന്‍വലിക്കാതെ എച്ച് 1ബി വിസയുള്ള വിദേശികള്‍ക്ക് അമേരിക്കയില്‍ തിരികെ പ്രവേശിക്കാനാകില്ല. ലോകത്താകമാനം കോവിഡ്-19 പടര്‍ന്നതോടെ പതിവ് വിസ സേവനങ്ങളെല്ലാം മാസങ്ങള്‍ക്ക് മുന്‍പേ യുഎസ് നിര്‍ത്തിവച്ചിരുന്നു.

മൂന്ന് വര്‍ഷമായി എച്ച് 1 ബി വിസകളുടെ എണ്ണം കുറയ്ക്കാനുള്ള ശ്രമത്തിലായിരുന്നു അമേരിക്കന്‍ ഭരണകൂടം. കോവിഡിന്‍റെ പശ്ചാത്തലത്തിലും അമേരിക്കന്‍ പൗരന്മാരുടെ തൊഴില്‍ സംരക്ഷണത്തിന്‍റെയും ഭാഗമായാണ് വിസാ നിയന്ത്രണത്തിനുള്ള ഉത്തരവില്‍ ഒപ്പുവയ്ക്കുന്നതെന്ന് ട്രംപ് പ്രതികരിച്ചിരുന്നു.