ബിജെപിയിലേക്കില്ലെന്ന് സച്ചിന്‍ പൈലറ്റ്; പുതിയ പാര്‍ട്ടി രൂപീകരണമെന്ന് സൂചന

ജയ്പൂര്‍: രാജസ്ഥാനില്‍ രാഷ്ട്രീയ പ്രതിസന്ധി തുടരവെ ബിജെപിയിലേക്കില്ലെന്ന് വ്യക്തമാക്കി രാജസ്ഥാന്‍ ഉപമുഖ്യമന്ത്രി സച്ചിന്‍ പൈലറ്റ്. ബിജെപി ദേശീയ അധ്യക്ഷന്‍ ജെ.പി നദ്ദയുമായി പൈലറ്റ് കൂടിക്കാഴ്ച്ച നടത്തുമെന്ന റിപ്പോര്‍ട്ടുകള്‍ക്ക് പിന്നാലെ ഒരു ദേശീയമാധ്യമത്തോട് പ്രതികരിക്കുകയായിരുന്നു അദ്ദേഹം.

അതേസമയം സച്ചിന്‍ പുതിയ പാര്‍ട്ടി രൂപീകരിക്കാനൊരുങ്ങുന്നു എന്ന റിപ്പോര്‍ട്ടുകളും പുറത്തുവരുന്നുണ്ട്. “പ്രകൃതിശീൽ കോൺഗ്രസ് ” എന്നാണ് സച്ചിൻ പൈലറ്റ് രൂപീകരിക്കുന്ന പുതിയ പാർട്ടിയുടെ പേരെന്ന് രാഷ്ട്രീയ വൃത്തങ്ങൾ പറയുന്നു. കോണ്‍ഗ്രസിനെ സമ്മര്‍ദ്ദത്തിലാക്കാനാണ് സച്ചിന്‍റെ നീക്കമെന്ന് രാഷ്ട്രീയ നീരിക്ഷകര്‍ ചൂണ്ടിക്കാട്ടുന്നു.

മുന്‍ കോണ്‍ഗ്രസ് നേതാവ് ജോതിരാദിത്യ സിന്ധ്യയ്ക്ക് പിന്നാലെ സച്ചിൻ പൈലറ്റും ബിജെപിയിലേക്ക് പോകുന്നുവെന്ന അഭ്യൂഹങ്ങള്‍ ഉയര്‍ന്നിരുന്നു. പാര്‍ട്ടിക്കെതിരെ തുറന്നയുദ്ധം പ്രഖ്യാപിച്ച സച്ചിന്‍ പൈലറ്റിന്‍റെ നീക്കത്തെ വിട്ടുവീഴ്ച്ചയില്ലാതെ നേരിടാന്‍ തന്നെയാണ് കോണ്‍ഗ്രസിന്‍റെ തീരുമാനം. സച്ചിനെതിരെ നടപടി എടുക്കാന്‍ പാര്‍ട്ടി ആലോചിക്കുന്നതായാണ് സൂചന.