കേരള ശാസ്ത്ര കോണ്‍ഗ്രസ് പുരോഗമിക്കുന്നു

ശാസ്ത്ര സാങ്കേതിക പരിസ്ഥിതി കൗണ്‍സിലിന്റെ 33 മത് കേരള ശാസ്ത്ര കോണ്‍ഗ്രസ് പുരോഗമിക്കുന്നു. തിരുവനന്തപുരം ശാസ്ത്രി ഭവനില്‍ നടക്കുന്ന പരിപാടിയില്‍ കഴിഞ്ഞ മൂന്ന് ദിവസങ്ങളിലായി 12 ല്‍ പരം വിഷയങ്ങളിലായി 62 ഗവേഷണ പ്രബന്ധങ്ങളും 43 പോസ്റ്ററുകളും അവതരിപ്പിച്ചു. തിങ്കളാഴ്ച നടന്ന ഡോ. പി. കെ അയ്യങ്കാര്‍ അനുസ്മരണ പ്രഭാഷണത്തില്‍ വി.എസ്.എസ്.സി ഡയറക്ടര്‍ ഡോ. സോമനാഥ് ‘സാങ്കേതികവിദ്യകളിലെ ഞങ്ങളുടെ അനുഭവം’ എന്ന വിഷയത്തില്‍ സംസാരിച്ചു. ചന്ദ്രനിലും മറ്റു ഗ്രഹങ്ങളിലും സാധ്യമാകുന്ന മനുഷ്യ വാസത്തെക്കുറിച്ചും പുനരുപയോഗിക്കാവുന്ന റോക്കറ്റുകളെക്കുറിച്ചും അദ്ദേഹം വിശദീകരിച്ചു.

ചൊവ്വാഴ്ച നടന്ന ഡോ.ജി.എന്‍ രാമചന്ദ്രന്‍ അനുസ്മരണ പ്രഭാഷണത്തില്‍ ആര്‍.ജി.സി.ബി ഡയറക്ടര്‍ പ്രൊഫ. ചന്ദ്രബാസ് നാരായണ ‘രാമന്‍ പ്രഭാവം ഉപയോഗിച്ചുള്ള രോഗ നിര്‍ണ്ണയ ചികിത്സാ രീതികളെക്കുറിച്ച് ‘ വിശദീകരിച്ചു. ബുധനാഴ്ച ഡോ. പി.കെ ഗോപാലകൃഷ്ണന്‍ അനുസ്മരണ പ്രഭാഷണത്തില്‍ കോസ്റ്റ്ഫോഡ് ചെയര്‍മാന്‍ പ്രൊഫ. കെ. പി. കണ്ണന്‍ ‘കേരള മോഡല്‍ വികസന പദ്ധതികളെ’ പ്രതിപാദിച്ചു. നാളെ (ജനുവരി 29) ദേശീയ ബാലശാസ്ത്രകോണ്‍ഗ്രസിലേക്ക് കേരളത്തില്‍ നിന്ന് തിരഞ്ഞെടുക്കപ്പെട്ട 16 ബാലശാസ്ത്രജ്ഞര്‍ പ്രബന്ധങ്ങള്‍ അവതരിപ്പിക്കും.

ജനുവരി 30 ന് മുഖ്യമന്ത്രി പിണറായി വിജയന്‍ സമ്മേളനം ഔപചാരികമായി ഉദ്ഘാടനം ചെയ്യും. ചടങ്ങില്‍ ചീഫ് മിനിസ്റ്റേഴ്‌സ് ഗോള്‍ഡ് മെഡല്‍, യുവ ശാസ്ത്ര പുരസ്‌കാരം, ശാസ്ത്ര സാഹിത്യ അവര്‍ഡ് എന്നിവ വിതരണം ചെയ്യും.