ലൈഫ് മിഷന്‍: തെറ്റ് ചെയ്യാത്തവര്‍ എന്തിന് സിബിഐയെ ഭയക്കണമെന്ന് കെ.സുരേന്ദ്രന്‍

തിരുവനന്തപുരം: ലൈഫ് മിഷന്‍ അഴിമതി കേസില്‍ സിബിഐ അന്വേഷണത്തിനെതിരെ സര്‍ക്കാര്‍ ഹൈക്കോടതിയെ സമീപിക്കുന്നത് ഭയം കൊണ്ടാണെന്ന് ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍. തെറ്റ് ചെയ്യാത്തവര്‍ എന്തിനാണ് സിബിഐ അന്വേഷണത്തെ എതിര്‍ക്കുന്നതെന്നും അദ്ദേഹം പ്രസ്താവനയില്‍ ചോദിച്ചു.

ഏത് അന്വേഷണവും നേരിടാന്‍ തയ്യാറാണെന്നും എന്‍ഐഎ വന്നത് താന്‍ പറഞ്ഞിട്ടാണെന്നും പറയുന്ന മുഖ്യമന്ത്രി എന്തിനാണ് ലൈഫ് മിഷനുമായി ബന്ധപ്പെട്ട അന്വേഷണത്തിന്റെ കാര്യത്തില്‍ കേന്ദ്ര ഏജന്‍സികളെ എതിര്‍ക്കുന്നതെന്ന് സുരേന്ദ്രന്‍ ചോദിച്ചു. വിദേശ സഹായം സ്വീകരിച്ച സമാനമായ കേസ് സിബിഐക്ക് വിട്ട പിണറായി ലൈഫ് തട്ടിപ്പില്‍ ഇരട്ടത്താപ്പ് കാണിക്കുന്നത് സ്വന്തം കസേര രക്ഷിക്കാനാണെന്നും സുരേന്ദ്രന്‍ ആരോപിച്ചു.

വിദേശ ധനസഹായത്തിന്റെ ചട്ടം ലംഘിച്ചതു കൊണ്ടാണ് സിബിഐക്ക് അന്വേഷിക്കേണ്ടി വന്നത്. പാവപ്പെട്ട ജനങ്ങള്‍ക്ക് വീടുവെക്കാനുള്ള പണം കമ്മീഷനടിച്ച സര്‍ക്കാര്‍ അതിനെതിരായ അന്വേഷണം അട്ടിമറിക്കാന്‍ ജനങ്ങളുടെ പണം ചെലവഴിക്കുന്നത് നാണംക്കെട്ട ഏര്‍പ്പാടാണെന്നും ബിജെപി സംസ്ഥാന അധ്യക്ഷന്‍ കുറ്റപ്പെടുത്തി.