ഇന്ത്യന്‍ വംശജ കമല ഹാരിസ് ഡെമോക്രാറ്റിക് വൈസ് പ്രസിഡന്റ് സ്ഥാനാര്‍ത്ഥി

വാഷിംഗ്ടണ്‍: അമേരിക്കന്‍ തെരഞ്ഞെടുപ്പില്‍ ഡെമോക്രാറ്റിക് പാര്‍ട്ടിയുടെ വൈസ് പ്രസിഡന്റ് സ്ഥാനാര്‍ത്ഥിയായി ഇന്ത്യന്‍ വംശജ കമല ഹാരിസ്. പാര്‍ട്ടി പ്രസിഡന്റ് ജോ ബൈഡനാണ് കമല ഹാരിസിനെ സ്ഥാനാര്‍ത്ഥിയായി പ്രഖ്യാപിച്ചത്. ട്വിറ്ററിലൂടെയാണ് അദ്ദേഹം സ്ഥാനാര്‍ത്ഥി പ്രഖ്യാപനം നടത്തിയത്. നിലവില്‍ കാലിഫോര്‍ണിയയില്‍ നിന്നുളള സെനറ്റംഗമാണ് അഭിഭാഷകയായ കമല. വൈസ് പ്രസിഡന്റ് സ്ഥാനത്തേക്ക് മത്സരിക്കുന്ന ആദ്യ ഏഷ്യന്‍ വംശജ കൂടിയാണ് കമല.

വൈസ്പ്രസിഡന്റ് സ്ഥാനത്തേക്ക് കമലയെ തെരഞ്ഞെടുത്തു. കമല രാജ്യത്തെ മികച്ച പൊതു പ്രവര്‍ത്തകരില്‍ ഒരാളും ധൈര്യശാലിയായ പോരാളിയുമാണ്- ജോ ബൈഡന്‍ ട്വിറ്ററില്‍ കുറിച്ചു.

ഡെമോക്രാറ്റിക് പാര്‍ട്ടിയുടെ വൈസ് പ്രസിഡന്റ് സ്ഥാനാര്‍ത്ഥി ഒരു വനിതയായിരിക്കുമെന്ന് നേരത്തെ ജോ ബൈഡന്‍ പ്രഖ്യാപിച്ചിരുന്നു. തീരുമാനത്തെ ബെറാക് ഒബാമയും സ്വാഗതം ചെയ്തു.

തന്നെ സ്ഥാനാര്‍ത്ഥിയായി തെരഞ്ഞെടുത്തതില്‍ ബഹുമാനിതയായെന്നും ബൈഡന് എല്ലാ പിന്തുണയും നല്‍കുമെന്നും കമല പറഞ്ഞു. രാജ്യത്തെ ജനങ്ങളെ ഏകോപിപ്പിക്കാന്‍ കഴിയുന്ന നേതാവാണ് ബൈഡനെന്ന് കമല പറഞ്ഞു.

ചെന്നെയില്‍ നിന്നും അമേരിക്കയില്‍ എത്തിയ കാന്‍സര്‍ ഗവേഷക ശ്യാമള ഗോപാലിന്റെയും ജമേക്കന്‍ വംശജന്‍ ഡോണള്‍ ഹാരിസിന്റെയും മകളാണ് കമല. ജോര്‍ജ്ജ് ഫ്‌ളോടിഡിന്റെ മരണത്തെ തുടര്‍ന്ന് വംശായാധിക്ഷേപത്തെ കുറിച്ച് ശബ്ദമുയര്‍ത്തുകയും പോലീസ് പരിഷ്‌കരണത്തിന്റെ ആവശ്യകതയുമായി മുന്നോട്ട് വരികയും ചെയ്തിരുന്നു.