ഈദ് ഉൽ അസ്ഹ ആഘോഷം; മുന്നറിയിപ്പുമായി യു.എ.ഇ

ഈദ് ഉൽ അസ്ഹ സമയത്തു പാലിക്കേണ്ട സാമൂഹിക അകലം രാജ്യത്തോടുള്ള പ്രതിബദ്ധതയെന്നു യു. എ. ഇ. ആരോഗ്യ പ്രതിരോധ മന്ത്രി ഡോ. അബ്ദുൾ റഹ്മാൻ ബിൻ മുഹമ്മദ് ബിൻ നാസർ അൽ ഒവൈസ്. ഒപ്പം കൊറോണ വൈറസ് പ്രതിസന്ധിഘട്ടത്തിൽ പ്രതിരോധത്തിന്റെ മുൻനിരയിൽ പ്രവർത്തിച്ചവരുടെ പങ്കിനെയും മഹത്തായ ത്യാഗത്തെയും അദ്ദേഹം പ്രശംസിച്ചു. നിയന്ത്രണങ്ങൾ പാലിച്ചു കൊണ്ടുള്ള ആഘോഷ പരിപാടികൾക്കെ അനുമതിയുള്ളു. നിരവധി വ്യക്തികൾ അവരുടെ കുടുംബങ്ങളിൽ നിന്ന് ഇപ്പോഴും അകന്നു കഴിയുന്നു, അത് വലിയ നന്ദിയും അഭിനന്ദനവും അർഹിക്കുന്ന ത്യാഗമാണ് എന്നും അദ്ദേഹം കൂട്ടി ച്ചേർത്തു.

ബലിപെരുന്നാള്‍ പടിവാതില്‍ക്കലെത്തി നില്‍ക്കുമ്പോൾ പൊതു ജന ആരോഗ്യത്തിന് പ്രഥമ പരിഗണന നൽകുന്ന രീതിയിലാണ് അധികൃതർ നിയന്ത്രങ്ങൾ നടപ്പാക്കുന്നത് . അത്തരം നീക്കങ്ങൾക്ക് കർശന മുന്നറിയിപ്പ് നൽകിയിട്ടുണ്ട്. കൂട്ടം ചേര്‍ന്നുള്ള ആഘോഷങ്ങള്‍ വീണ്ടും വൈറസ് വ്യാപനത്തിന് കാരണമായേക്കാം. ആരോഗ്യവകുപ്പിന്റെ ഇതുവരെയുള്ള ആരോഗ്യ സുരക്ഷ ശ്രമങ്ങള്‍ക്ക് അത് വെല്ലുവിളിയുയര്‍ത്തിയേക്കും. അതിനാല്‍ കൂട്ടം ചേരലുകളില്‍ നിന്നും ഒഴിവായികൊണ്ട് പെരുന്നാള്‍ ആഘോഷിക്കണം. പെരുന്നാളിന്റെ ഭാഗമായി അടുത്ത ബന്ധുക്കളെ സന്ദര്‍ശിക്കുന്നവര്‍ പരമ്പരാഗത രീതിയിലുള്ള ഉപചാരങ്ങളില്‍ നിന്നും വിട്ടുനില്‍ക്കണം.

കാണുമ്പോൾ ആലിംഗനം ചെയ്യുന്നതടക്കമുള്ള കാര്യങ്ങള്‍ ഒഴിവാക്കണം. മുഖാവരണങ്ങളും കയ്യുറകളും ധരിക്കണം. കൈകള്‍ കൃത്യമായ ഇടവേളകളില്‍ അണുവിമുക്തമാക്കണം. വ്യക്തികള്‍ തമ്മില്‍ അകലം പാലിക്കുന്നത് തന്നെയാണ് പ്രധാന കരുതല്‍. രോഗപ്രതിരോധ ശേഷി കുറഞ്ഞ മുതിര്‍ന്നവരും ഗര്‍ഭിണികളും കുട്ടികളുമടക്കമുള്ളവരുടെ കരുതല്‍ ഓരോരുത്തരുടെയും ഉത്തരവാദിത്വമാണ്. സംസാരത്തിലൂടെയും ചിരിയിലൂടെയുമെല്ലാം വൈറസ് പകര്‍ന്നേക്കാമെന്നതിനാല്‍ ആളുകള്‍ പ്രത്യേക ശ്രദ്ധ നല്‍കണമെന്നും അധികൃതർ അറിയിച്ചു.