പ്രശസ്ത ബംഗാളി നര്‍ത്തകി അമല ശങ്കര്‍ അന്തരിച്ചു

കൊല്‍ക്കത്ത: പ്രശസ്ത ബംഗാളി നര്‍ത്തകി അമല ശങ്കര്‍ അന്തരിച്ചു. 101ാം വയസ്സിലായിരുന്നു അമല മരണത്തിന് കീഴടങ്ങിയത്. 1930 കളിലാണ് അമല ശങ്കര്‍ തന്റെ നാട്യ ജീവിതം ആരംഭിക്കുന്നത്. അക്കാലത്ത് അപൂര്‍വ്വമായിട്ടായിരുന്നു സ്ത്രീകള്‍ പൊതു വേദികളില്‍ നൃത്തം അവതരിപ്പിച്ചിരുന്നത്. അക്കൂട്ടത്തിലൊരാളായിരുന്നു അമല. അതുകൊണ്ട് തന്നെ ഇന്ത്യയില്‍ സ്ത്രീകള്‍ക്ക് പൊതുവേദികളില്‍ ചുവടുവെയ്ക്കാന്‍ വഴിയൊരുക്കി കൊടുത്തവരിലൊരാണ് ഈ നര്‍ത്തകി. ഇന്ത്യന്‍ ഫ്യൂഷന്‍ നൃത്തത്തെ ലോകമെമ്പാടും ജനപ്രിയമാക്കുന്നതില്‍ ഭര്‍ത്താവ് ഉദയ് ശങ്കറിനൊപ്പം അമലയും പ്രധാന പങ്കു വഹിച്ചിരുന്നു. ഓരോ നൃത്തരൂപവും അമലയ്ക്ക് കഥപറയാനും സന്ദേശം നല്‍കാനും ഉളളതായിരുന്നു.

നൃത്ത ശൈലിയിലും വേഷവിധാനങ്ങളിലും ആധുനികമായ പരീക്ഷണങ്ങള്‍ അമല ശങ്കര്‍ നടത്തിയിരുന്നു. യൂറോപ്യന്‍ തീയേറ്റര്‍ ശൈലിയെ ഇന്ത്യന്‍ നൃത്ത പരമ്പരയുമായി ചേര്‍ത്തുളള ഫ്യൂഷനുകളാണ് പ്രധാനമായും വേദികളില്‍ അവതരിപ്പിച്ചിരുന്നത്. 1931 ല്‍ ഇന്നത്തെ ബംഗ്ലാദേശിലാണ് അമല ശങ്കര്‍ ജനിച്ചത്. ചെറുപ്പം മുതല്‍ തന്ന കലയോട് വളരെ താല്‍പര്യമുളളയാളായിരുന്നു അമല. ജൂണ്‍ 27 ന് അമല ശങ്കറിന്റെ 101ാം ജന്മദിനം കുടുംബാംഗങ്ങള്‍ ആഘോഷിച്ചിരുന്നു. നിരവധി പേരാണ് സോഷ്യല്‍ മീഡിയകളില്‍ അമലയ്ക്ക് അനുശോചനം അറിയിച്ചിരിക്കുന്നത്.