സൈബർ കുറ്റകൃത്യങ്ങൾക്കെതിരെ ജാഗ്രത പാലിക്കണമെന്ന് റാസൽഖൈമ പൊലീസ്.

റാസൽഖൈമ : ഓൺലൈൻ തട്ടിപ്പുകളെ ചെറുക്കുന്നതിനായി റാസൽഖൈമ ബ്രോഡ്കാസ്റ്റിങ് അതോറിറ്റിയുമായി സഹകരിച്ച് റാസൽഖൈമ പൊലീസ് ജനറൽ കമാൻഡ് ‘ബിവെയർ ഓഫ് സൈബർ ക്രൈം’ എന്ന പേരിൽ പൊതുജന ബോധവൽകരണ ക്യാംപെയ്ൻ ആരംഭിച്ചു.
തട്ടിപ്പ് നടത്തുന്നവരെയും സാധ്യതയുള്ള തട്ടിപ്പുകളെയും തിരിച്ചറിയുന്നതിന് റാസൽ ഖൈമ പൊലീസ് ഉദ്യോഗസ്ഥരും മീഡിയ ആൻഡ് പബ്ലിക് റിലേഷൻസ് ഡിപ്പാർട്ട്‌മെന്റും ഡിപ്പാർട്ട്‌മെന്റ് ഓഫ് ക്രിമിനൽ ഇൻവെസ്റ്റിഗേഷൻസും തമ്മിലുള്ള സംയുക്ത ശ്രമമാണ് ഈ ക്യാംപെയ്ൻ ലക്ഷ്യമിടുന്നത്. സജീവവും നൂതനവുമായ സേവനങ്ങളിലൂടെ എല്ലാവരുടെയും ജീവിതനിലവാരം മെച്ചപ്പെടുത്താനുള്ള യുഎഇ ആഭ്യന്തര മന്ത്രാലയത്തിന്റെ ദൗത്യത്തിന്റെ ഭാഗമാണ് പരിപാടി.
വ്യാജ ഇലക്ട്രോണിക് ലിങ്കുകൾ, ഫിഷിങ് സന്ദേശങ്ങൾ, ഫോൺ കോളുകൾ, വഞ്ചനാപരമായ പരസ്യങ്ങൾ എന്നിവ പോലുള്ള സൈബർ കുറ്റകൃത്യങ്ങൾ തടയുന്നതിൽ വിദഗ്ധരുമായി തത്സമയ സംവാദം, സൈബർ കുറ്റവാളികൾ ഉപയോഗിക്കുന്ന ടെക്നിക്കുകളും തന്ത്രങ്ങളെയും കുറിച്ചും ക്യാംപെയ്നിൽ പറയുന്നു. 
റാസൽഖൈമ പൊലീസ് മീഡിയ ആൻഡ് പബ്ലിക് റിലേഷൻസ് ഡിപ്പാർട്ട്‌മെന്റ് ഡയറക്ടർ കേണൽ ഹമദ് അബ്ദുല്ല അൽ അവാദി ക്യാംപെയ്നിൽ പങ്കെടുക്കുന്നവരുടെ അനുഭവങ്ങൾ കേട്ടറിഞ്ഞ് സൈബർ കുറ്റകൃത്യങ്ങൾ എങ്ങനെ ഒഴിവാക്കാമെന്നതിനെ കുറിച്ചും ഫലപ്രദമായി കൈകാര്യം ചെയ്യാമെന്നതിനെ കുറിച്ചും സംസാരിക്കും.