വ്യാപാര സ്ഥാപനങ്ങള്‍ നികുതി ഇല്ലാത്ത സാധനങ്ങളുടെ ലിസ്റ്റ് പ്രദര്‍ശിപ്പിക്കണം

വാറ്റില്‍ നിന്ന് ഒഴിവാക്കിയിട്ടുള്ള സാമഗ്രികളുടെ ലിസ്റ്റ് വ്യാപാര സ്ഥാപനങ്ങളില്‍ നിര്‍ബന്ധമായും പ്രദര്‍ശിപ്പിക്കണമെന്ന് ഉപഭോക്തൃ സംരക്ഷണ അഥറോറ്റി.

മസ്‌കത്ത് മൂല്യ വര്‍ദ്ധിത നികുതി ഒഴിവാക്കിയിട്ടുള്ള അവശ്യ ഭക്ഷ്യവസ്തുക്കളുടെ ലിസ്റ്റ് കടകളില്‍ പ്രസിദ്ധീകരിക്കണമെന്ന് കണ്‍സ്യൂമര്‍ പ്രൊട്ടക്ഷന്‍ അഥോറിറ്റി അറിയിച്ചു.

എല്ലാ വ്യാപാര സ്ഥാപനങ്ങള്‍ക്കും കടകള്‍ക്കും ഇതു സംബന്ധിച്ച് സര്‍ക്കുലര്‍ നല്‍കിയതായി സിപിഎ പറഞ്ഞു.

നിത്യ ജീവിതത്തില്‍ ആവശ്യമുള്ള ഭക്ഷണങ്ങളെയാണ് നികുതിയില്‍ നിന്നും ഒഴിവാക്കിയിട്ടുള്ളത്. ഇവയ്ക്ക് നികുതി ഇല്ലെന്നുള്ളത് ഷോപ്പുകളിലും വ്യാപാര സ്ഥാപനങ്ങളിലും പ്രദര്‍ശിപ്പിക്കണമെന്നാണ് പുതിയ സര്‍ക്കുലറില്‍ പറയുന്നത്.

ഗോതമ്പ്, അരി, ബാര്‍ലി, ചോളം ഇവയില്‍ നിന്നുമുള്ള ധാന്യപൊടികള്‍ പാല്‍, പാല്‍പ്പൊടി, ചീസ്, തൈര്, ബ്രഡ്, കുടിവെള്ളം, പഞ്ചസാര, ഉപ്പ് , പഴ വര്‍ഗങ്ങള്‍, പച്ചക്കറികള്‍, മാംസം, മത്സ്യം, മുട്ട, ചിക്കന്‍, കോഫി, ചായ തുടങ്ങിയവയെല്ലാം മൂല്യ വര്‍ദ്ധിത നികുതിയില്‍ നിന്നും ഒഴിവാക്കിയിട്ടുള്ളതാണ്.

ചില മരുന്നുകളും കുട്ടികള്‍ക്കാവശ്യമുള്ള വസ്തുക്കളും ഇതേപോലെ വാറ്റ് ഒഴിവാക്കിയവയാണ്. ആരോഗ്യ മേഖലയിലെ സേവനങ്ങള്‍, വിദ്യാഭ്യാസം, വീട്ടുവാടക, പൊതുഗതാഗതം എന്നിവയും വാറ്റ് രഹിത പട്ടികയിലുണ്ട്.

ജീവന്‍ രക്ഷയ്ക്ക് അടിയന്തരാവശ്യമുള്ളവ, സൈനികവാശ്യങ്ങള്‍ക്കുള്ളവ, രാജ്യാന്തര സംഘടനകളുടേയും നയതന്ത്ര കാര്യാലയങ്ങളുടേയും ആവശ്യങ്ങള്‍ക്കുള്ളവയും വാറ്റ് ഒഴിവാക്കിയവയിലുണ്ട്.

ഒമാനില്‍ ആദ്യമായി എത്തുന്ന യാത്രക്കാര്‍ക്ക് വിമാനത്താവളങ്ങളില്‍ വാറ്റ് രഹിത പര്‍ച്ചേസുകള്‍ നടത്താം. സമ്മാനങ്ങള്‍ ലഭിക്കുന്നതും അംഗപരിമിതരുടെ ആവശ്യങ്ങള്‍ക്കുള്ള സാമഗ്രികള്‍ക്കും വാറ്റില്ല.

വാറ്റ് രഹിത സാമഗ്രികളുടെ പട്ടിക പ്രസിദ്ധീകരിക്കുന്നത് ശരിയായി നടപ്പിലാക്കാന്‍ വ്യാപാര സ്ഥാപനങ്ങളില്‍ അധികൃതര്‍ അപ്രതീക്ഷിത സന്ദര്‍ശനം നടത്തുമെന്നും അധികൃതര്‍ അറിയിച്ചു.