ബഹ്‌റൈനിൽ ശരത്കാല മേളയുടെ റജിസ്‌ട്രേഷൻ ഉടൻ

മനാമ : ബഹ്‌റൈനിലെ ഏറ്റവും വലിയ ഉപഭോക്തൃ പ്രദർശനമേളയായ ശരത്കാല മേളയുടെ റജിസ്‌ട്രേഷൻ സഖീറിലെ എക്‌സിബിഷൻ വേൾഡ് ബഹ്‌റൈനിൽ ഉടൻ ആരംഭിക്കും. ശരത്കാല മേളയുടെ 35-ാമത് എഡിഷനാണ് ജനുവരി 23 മുതൽ ഫെബ്രുവരി 1 വരെ നടക്കുക. 20 രാജ്യങ്ങളിൽ നിന്ന് 608ലധികം പവിലിയനുകളാണ് ഇത്തവണ മേളയിൽ പ്രാതിനിധ്യം ഉണ്ടാവുക. രാജ്യത്തെ റീട്ടെയിൽ മേഖലയിൽ നിന്നുള്ള തുണിത്തരങ്ങൾ, ഫർണിച്ചറുകൾ, ഭക്ഷണ ഉൽപന്നങ്ങൾ, വസ്ത്രങ്ങൾ, ഇലക്ട്രോണിക്സ്, ഇലക്ട്രിക്കൽ സാധനങ്ങൾ, ആക്സസറികൾ, സൗന്ദര്യവർധക വസ്തുക്കൾ, അലങ്കാരങ്ങൾ, വീട്ടുപകരണങ്ങൾ തുടങ്ങി നിരവധി ഉൽപ്പന്നങ്ങൾ പ്രദർശകർ വാഗ്ദാനം ചെയ്യുന്നു.
എക്‌സിബിഷൻ വേൾഡ് ബഹ്‌റൈനിൽ നടക്കുന്ന എക്‌സിബിഷനുകളുടെ അജണ്ടയിലെ പ്രധാന പരിപാടികളിലൊന്നായാണ് ഈ മേള കണക്കാക്കപ്പെടുന്നതെന്ന് ബഹ്‌റൈൻ ടൂറിസം ആൻഡ് എക്‌സിബിഷൻസ് അതോറിറ്റി ചീഫ് എക്സിക്യൂട്ടീവും ബഹ്‌റൈൻ ഇന്‍റർനാഷനൽ എക്‌സിബിഷൻ സെന്‍റർ ബോർഡ് ചെയർമാനുമായ സാറാ ബുഹിജി പറഞ്ഞു.
ബഹ്‌റൈനിലെ പ്രധാന ഷോപ്പിങ്, റീട്ടെയിൽ വ്യവസായത്തെ ഉയർത്തിക്കാട്ടിക്കൊണ്ട് പ്രാദേശിക, രാജ്യാന്തര ഉൽപന്നങ്ങളുള്ള ഒരു വലിയ ശേഖരം തന്നെ ഇത്തവണ ഉണ്ടാകുമെന്ന് പ്രതീക്ഷിക്കുന്നതായും അദ്ദേഹം പറഞ്ഞു. സന്ദർശകർക്ക് കുടുംബാനുഭവങ്ങൾ നൽകാൻ സഹായിക്കുന്ന വിനോദ പരിപാടികൾക്കും പ്രോഗ്രാമുകൾക്കും പുറമെ കൂടുതൽ സവിശേഷമായ ഷോപ്പിങ് അവസരങ്ങളും ഈ വർഷത്തെ പതിപ്പിൽ ഉൾപ്പെടുത്തുമെന്ന് ബുഹിജി സൂചിപ്പിച്ചു.