നഴ്്‌സ്‌സിംഗ് പഠനത്തിന് 10 കോടി രൂപയുടെ സ്‌കോളർഷിപ്പ്

കൊച്ചി: ആസ്‌ട്രേലിയലിലെ ഇൻസ്റ്റിറ്റിയൂട്ട് ഒഫ് ഹെൽത്ത് ആൻഡ് മാനേജ്‌മെന്റ് (ഐ.എച്ച്.എം) ഇന്ത്യയിൽ നിന്നുള്ള 1,000 നഴ്‌സിംഗ് വിദ്യാർത്ഥികൾക്കും നഴ്‌സുമാർക്കും 10 കോടി രൂപയുടെ സ്‌കോളർഷിപ്പുകൾ നൽകും. ‘ഗേറ്റ് വേ ടു ഗ്ലോബൽ നഴ്‌സിംഗ് ‘ പദ്ധതിയിൽ ചേരുന്നവർക്കാണ് സ്‌കോളർഷിപ്പുകൾ അനുവദിക്കുക.
സ്വജീവൻ അവഗണിച്ച് കൊവിഡിനെ നേരിടുന്നതിൽ നഴ്‌സുമാരും മറ്റ് ആരോഗ്യ പ്രവർത്തകരും പുലർത്തിയ അർപ്പണബോധത്തിനും ആത്മാർത്ഥയ്ക്കും അഗീകാരമാണ് പദ്ധതിയെന്ന് ഐ.എച്ച്.എം സ്ഥാപകനും മാനേജിംഗ് ഡയറക്ടറുമായ ബിജോ പറഞ്ഞു. പദ്ധതി അനുസരിച്ച് കോഴ്‌സിൽ ചേരുന്ന നഴ്‌സിംഗ് വിദ്യാർത്ഥിക്ക് 2,000 ആസ്‌ത്രേലിയൻ ഡോളർ സ്‌കോളർഷിപ്പായി ലഭിക്കും.
നഴ്‌സിംഗിൽ ബിരുദാനന്തരബിരുദം നൽകുന്ന ആസ്‌ത്രേലിയിലെ ഏക സ്വകാര്യ വിദ്യാഭ്യാസസ്ഥാപനമാണ് ഐ.എച്ച്.എം. ആസ്‌ത്രേലിയിലെ ഉന്നതവിദ്യാഭ്യാസമേഖലയിൽ ഇന്ത്യയിൽ വേരുകളുള്ള ഏക വ്യക്തിയാണ് ബിജോ. കൊവിഡ് മഹാമാരിയുടെ കാലത്ത് 1,500 നഴ്‌സുമാർ ഐ.എച്ച്.എമ്മിൽ നിന്ന് ബിരുദം നേടിയതായി സി.ഇ.ഒ ഡോ. ഫിലിപ്പ് ബ്രൗൺ പറഞ്ഞു.