ദിവസേന 20 ലക്ഷം; യുഎഇയിൽ ജനത്തിന് പ്രിയം പൊതുഗതാഗതം.

ദുബായ് : പൊതുഗതാഗതം കൂടുതൽ ജനപ്രിയമാകുന്നുവെന്ന് തെളിയിച്ച് ആർടിഎയുടെ കണക്കുകൾ. മുൻ വർഷത്തെ അപേക്ഷിച്ച് കഴിഞ്ഞ വർഷം പൊതുഗതാഗതം ഉപയോഗിച്ചവരുടെ എണ്ണത്തിൽ 6.4% ആണ് വർധന. 2024ൽ 74.71 കോടി പേരാണ് മെട്രോ , ട്രാം, ബസ്, ജല വാഹനങ്ങൾ, ഷെയർ മൊബിലിറ്റി, ടാക്സികൾ എന്നിവ ഉപയോഗിച്ചത്. ശരാശരി 20 ലക്ഷം പേരാണ് ഒരു ദിവസം പൊതുഗതാഗത വാഹനങ്ങളിൽ കയറുന്നത്. ആഡംബര പൊതുഗതാഗതമായ ലിമോസിൻ ഉപയോഗിച്ചവർ 1.9 കോടിയാണ്.  ദുബായ് മെട്രോയുടെ റെഡ്, ഗ്രീൻ ലൈനുകളിൽ കഴിഞ്ഞ വർഷം  27.54 കോടി യാത്ര ചെയ്തു. ഇന്റർ സെക്‌ഷനുകളായ ബുർജ്മാൻ, യൂണിയൻ സ്റ്റേഷനുകളിൽ മാത്രം യഥാക്രമം 1.62 കോടി, 1.29 കോടി ആളുകൾ എത്തി. റെഡ് ലൈനിൽ ഏറ്റവും കൂടുതൽ യാത്രക്കാരെത്തിയത് അൽ റിഗ്ഗ സ്റ്റേഷനിലാണ്, 1.3 കോടി.  ഗ്രീൻ ലൈനിൽ ഷറഫ് ഡിജിയാണ് മുന്നിൽ, 99 ലക്ഷം യാത്രക്കാർ.
പൊതുഗതാഗത വാഹനങ്ങൾ എല്ലാം കൂടി ചേർന്ന് 15.3 കോടി ട്രിപ്പുകൾ നടത്തി. ഇതിൽ ടാക്സികളാണ് 11.5 കോടി ട്രിപ്പുകൾ നടത്തിയത്. കഴിഞ്ഞ ഒക്ടോബർ, നവംബർ മാസങ്ങളിലാണ് ഏറ്റവും കൂടുതൽ സർവീസുകൾ, 1.41 കോടി ട്രിപ്പുകളാണ് ഈ മാസങ്ങളിൽ ഓടിയത്. നവംബറിൽ മാത്രം 6.99 കോടി യാത്രക്കാർ ടാക്സികൾ ഉപയോഗിച്ചു. ഡിസംബറിൽ യാത്രക്കാരുടെ എണ്ണം 6.8 കോടിയാണ്. ദുബായ് മെട്രോ 90 കിലോമീറ്ററും ട്രാം 11 കിലോമീറ്ററുമാണ് സഞ്ചരിക്കുന്നത്. ബസുകൾ ഇരുവശത്തേക്കുമായി സർവീസ് നടത്തുന്നത് 3,974 കിലോമീറ്ററാണ്. 
റെയിൽ, റോഡ് ശൃംഖല വിപുലപ്പെടുത്തിയതിലൂടെ കൂടുതൽ പേർക്ക് പൊതുഗതാഗതം എത്തിയതിന്റെ നേട്ടമുണ്ടായെന്ന് ആർടിഎ ഡയറക്ടർ ജനറൽ മാത്തർ അൽ തായർ പറഞ്ഞു.  ടാക്സികൾക്കും ബസുകൾക്കും മാത്രമായുള്ള പ്രത്യേക ലെയ്നുകളുടെ എണ്ണം വർധിപ്പിക്കും. ഈ രണ്ടു വർഷങ്ങളിൽ ബസ്, ടാക്സി ലെയ്‌നുകൾ 13 കിലോമീറ്റർ കൂടി വർധിപ്പിക്കാൻ ആർടിഎ തീരുമാനിച്ചു. 
ഇതോടെ ബസ്, ടാക്സി യാത്രാ സമയത്തിൽ 41% കുറവുണ്ടാകും. ദുബായിയുടെ 8 മേഖലകളിൽ ട്രാക്ക് ഇല്ലാത്ത ട്രാം സർവീസുകൾ തുടങ്ങുന്നതിന്റെ സാധ്യതകളും പരിശോധിക്കുകയാണ്. വൈദ്യുതിയിൽ പ്രവർത്തിക്കുന്ന ട്രാമുകൾക്ക് ക്യാമറ ഉപയോഗിച്ചുള്ള ലെയ്ൻ ട്രാക്കിങ് സംവിധാനമാണുള്ളത്. ഡ്രൈവറില്ലാ ബസുകളും ഉടൻ നിരത്തിലെത്തും.