ഗൂഗിൾ പേ ഒമാനിലും സജീവമായി: ആൻഡ്രോയിഡ് ഉപയോക്താക്കൾക്ക് കോൺടാക്റ്റ്‌ലെസ് പേയ്‌മെന്റുകൾക്ക് ആധുനിക പരിഹാരം

മസ്‌കത്ത് ∙ ഒമാനിലെ ആൻഡ്രോയിഡ് ഉപയോക്താക്കൾക്കായി ഗൂഗിൾ പേ സേവനം ഔദ്യോഗികമായി ആരംഭിച്ചതായി ഗൂഗിൾ പ്രഖ്യാപിച്ചു. ലെബനാനിനൊപ്പം ഒമാനിലും പുതിയ സേവനത്തിന് തുടക്കമിട്ടിരിക്കുന്നതായി കമ്പനി അറിയിച്ചു. കോൺടാക്റ്റ്‌ലെസ് പേയ്‌മെന്റുകൾ സ്വീകരിക്കുന്ന കടകളിലും സ്ഥാപനങ്ങളിലും ഉപഭോക്താക്കൾക്ക് ഗൂഗിൾ പേ ഉപയോഗിച്ച് പണമിടപാടുകൾ നടത്താൻ കഴിയും.

എങ്കിലും, ഗൂഗിൾ പേ ഉപയോഗിച്ച് നേരിട്ട് പണമയക്കുകയോ സേവനങ്ങൾക്ക് പണം അടക്കുകയോ നിലവിൽ സാധ്യമല്ല. ഗൂഗിൾ പേ പിന്തുണക്കുന്ന വെബ്സൈറ്റുകളിലെയും ആപ്പുകളിലെയും ഷോപ്പിംഗിനായി ഈ സംവിധാനം ഉപയോഗിക്കാവുന്നതാണ്. ഒമാനിൽ ഇപ്പോഴത്തെ സാഹചര്യത്തിൽ ഗൂഗിൾ പേ സേവനം നൽകുന്നത് സൊഹാർ ഇന്റർനാഷണൽ ബാങ്ക് മാത്രമാണ്.

ഇത് നേരത്തെ ഒമാനിൽ അവതരിപ്പിച്ച ആപ്പിൾ പേ, സാംസങ്ങ് പേ സേവനങ്ങളുമായി സാമ്യമുള്ളതാണ്. ആ സേവനങ്ങൾ പരിധിയുള്ള ഉപഭോക്താക്കൾക്കായിരുന്നെങ്കിൽ, ഗൂഗിൾ പേ ഏറെയും എല്ലാ ആൻഡ്രോയിഡ് ഉപയോക്താക്കൾക്കും പ്രയോജനപ്പെടുത്താവുന്നതാണ്.

ഉപഭോക്താക്കൾക്ക് ഗൂഗിൾ വാലറ്റിനുള്ളിൽ ക്രെഡിറ്റ് അല്ലെങ്കിൽ ഡെബിറ്റ് കാർഡുകൾ ചേർക്കാനും, ഈ കാർഡുകൾ ഉപയോഗിച്ച് പേയ്‌മെന്റുകൾ നടത്താനും സാധിക്കും. കാർഡ് അധിഷ്ഠിത പണമിടപാട് സംവിധാനം കൊണ്ടുള്ള സുരക്ഷാപ്രശ്നങ്ങൾ പരിഹരിക്കാനായി കാർഡ് ടോക്കനൈസേഷൻ എന്ന രീതിയിലേക്ക് മാറ്റം ലക്ഷ്യമിട്ടുകൊണ്ട് ഒമാൻ സെൻട്രൽ ബാങ്ക് നേരത്തെ ബാങ്കുകൾക്കും പേയ്‌മെന്റ് സേവന ദാതാക്കൾക്കും മാർഗനിർദേശങ്ങൾ പുറത്തിറക്കിയിരുന്നു.