കോവിഡിന്റെ ഉറവിടം: അന്വേഷണ സംഘത്തോട് ചൈനയുടെ നിസ്സഹകരണമെന്ന് ഡബ്ല്യൂ.എച്ച്.ഒ

ബെയ്ജിംഗ്: കൊറോണ വൈറസിന്റെ ഉറവിടത്തെ സംബന്ധിച്ചുള്ള അന്വേഷണത്തിനായി തയ്യാറെടുക്കുന്ന ശാസ്ത്രജ്ഞര്‍ക്ക് ചൈനയിലേക്ക് പ്രവേശിക്കാന്‍ ഇതുവരെ അനുമതി ലഭിച്ചിട്ടില്ല എന്നത് തീര്‍ത്തും നിരാശാജനകമാണെന്ന് ലോകാരോഗ്യ സംഘടന.

വൈറസിന്റെ ഉറവിടം അന്വേഷിക്കുന്ന പത്തംഗ ടീമിലെ രണ്ട് പേര്‍ ഇതിനോടകം തന്നെ ചൈനയിലേക്ക് തിരിച്ചുവെന്നും എന്നാല്‍ ഇവര്‍ക്ക് ഇതുവരെ അനുമതി ലഭിച്ചില്ലെന്നും ലോകാരോഗ്യ സംഘടനാ തലവന്‍ ടെഡ്രോസ് അഥനോം പറഞ്ഞു. ജനീവയില്‍ നടന്ന ഒരു ഓണ്‍ലൈന്‍ ന്യൂസ് കോണ്‍ഫറന്‍സിലാണ് അദ്ദേഹം ചൈനയ്ക്കെതിരെ വിമര്‍ശനവുമായി രംഗത്തെത്തിയത്.

ശാസ്ത്രജ്ഞര്‍ക്ക് എല്ലാവിധ സൗകര്യങ്ങളും ഒരുക്കുമെന്ന് ചൈന അറിയിച്ചിരുന്നു. എന്നാല്‍ ചൈനീസ് ഉദ്യോഗസ്ഥര്‍ ശാസ്ത്രജ്ഞരെ സ്വീകരിക്കാനോ അവര്‍ക്ക് ഗവേഷണത്തിന് ആവശ്യമായ സജ്ജീകരണങ്ങള്‍ ഒരുക്കാനോ ഇതുവരെ തയ്യാറായിട്ടില്ല എന്നാണ് മനസിലാകുന്നത് എന്നും അദ്ദേഹം കൂട്ടിച്ചേര്‍ത്തു.