പാലത്തായി പീഡന കേസില്‍ കുറ്റവാളിക്ക് പരമാവധി ശിക്ഷ ഉറപ്പുവരുത്തണമെന്ന് വി.എം സുധീരന്‍

 

പാലത്തായി കേസില്‍ ഇരയ്ക്ക് നീതി നല്‍കണമെന്ന് ആവശ്യപ്പെടുകൊണ്ട് വി.എം സുധീരന്‍ മുഖ്യമന്ത്രി പിണറായി വിജയന് കത്തയച്ചു. ഇരയ്ക്കും കുടുംബത്തിനും നീതിനല്‍കിയേ മതിയാകൂവെന്നും കുറ്റവാളിക്ക് പരമാവധി ശിക്ഷ ഉറപ്പുവരുത്തുകയും വേണമെന്നും കത്തില്‍ പറയുന്നു. ഇക്കാര്യത്തില്‍ സര്‍ക്കാരിന്റെ ഭാഗത്തുനിന്നും ഇനിയെങ്കിലും ഉപേക്ഷ ഉണ്ടാവരുതെന്നും അദ്ദേഹം പറഞ്ഞു.

കത്തിന്റെ പൂര്‍ണ്ണരൂപം:

പ്രിയപ്പെട്ട മുഖ്യമന്ത്രി,

പാനൂര്‍ പാലത്തായിയില്‍ വിദ്യാര്‍ത്ഥിനിയെ പീഡിപ്പിച്ച കേസില്‍ തുടരന്വേഷണം നടത്താന്‍ തലശ്ശേരി അഡീഷണല്‍ ജില്ലാ കോടതി ഉത്തരവിട്ടിരിക്കുകയാണല്ലോ. അന്വേഷണ സംഘം സമര്‍പ്പിച്ച കുറ്റപത്രത്തില്‍വന്ന അപാകതയുടെ അടിസ്ഥാനത്തിലാണിത്.

ഈ കേസ്സന്വേഷണത്തില്‍ വീഴ്ചവരുത്തിയവരും മേല്‍നോട്ടത്തില്‍ പാളിച്ചവരുത്തിയവരുമായ ഉന്നത പൊലീസ് ഉദ്യോഗസ്ഥരുള്‍പ്പെടെയുള്ള അന്വേഷണ സംഘത്തെ പൂര്‍ണ്ണമായി മാറ്റി എ.ഡി.ജി.പി. റാങ്കിലുള്ള വനിതാപൊലീസ് ഓഫീസറുടെ മേല്‍നോട്ടത്തില്‍ കാര്യക്ഷമതയുള്ളവരും സത്യസന്ധരുമായ പൊലീസ് ഉദ്യോഗസ്ഥരുടെ ഒരു സ്‌പെഷ്യല്‍ടീമിനെ നിയോഗിക്കണമെന്ന് താല്‍പര്യപ്പെടുന്നു.

ഈ കേസ്സ് അട്ടിമറിക്കുന്നതിന് പൊലീസിലെ ഉന്നതര്‍ ഉള്‍പ്പെടെയുള്ളവര്‍ മനപ്പൂര്‍വ്വം നടത്തിയ വീഴ്ചകളെക്കുറിച്ച് ആഭ്യന്തരവകുപ്പ് സെക്രട്ടറിതലത്തിലുള്ള അന്വേഷണം നടത്തി ഉത്തരവാദികളായവരെ ഉചിതമായ ശിക്ഷാനടപടിക്ക് വിധേയരാക്കണം.

ഇരയ്ക്കും കുടുംബത്തിനും നീതിനല്‍കിയേ മതിയാകൂ. കുറ്റവാളിക്ക് പരമാവധി ശിക്ഷ ഉറപ്പുവരുത്തുകയും വേണം. ഇക്കാര്യത്തില്‍ സര്‍ക്കാരിന്റെഭാഗത്തുനിന്നും ഇനിയെങ്കിലും ഉപേക്ഷ ഉണ്ടാവരുത്.

സ്‌നേഹപൂര്‍വ്വം

വി.എം.സുധീരന്‍