ടൂള്‍ കിറ്റ് കേസ്: ദിശ രവിയെ മൂന്ന് ദിവസത്തെ ജുഡീഷ്യല്‍ കസ്റ്റഡിയില്‍ വിട്ടു

ഡല്‍ഹി: ടൂള്‍കിറ്റ് കേസില്‍ അറസ്റ്റിലായ പരിസ്ഥിതി പ്രവര്‍ത്തക ദിശ രവിയെ മൂന്ന് ദിവസത്തെ ജുഡീഷ്യല്‍ കസ്റ്റഡിയില്‍ വിട്ടു. അതേസമയം ദിശ രവി ജാമ്യാപേക്ഷ നല്‍കിയിട്ടുണ്ട്. ഇത് കോടതി നാളെ പരിഗണിക്കും.

മൂന്ന് ദിവസം കൂടി റിമാന്‍ഡ് ആവശ്യപ്പെട്ട് നേരത്തെ തന്നെ ദില്ലി പൊലീസ് പട്യാല ഹൗസ് കോടതിയെ സമീപിച്ചിരുന്നു. ടൂള്‍കിറ്റ് കേസുമായി ബന്ധപ്പെട്ട് ചോദ്യം ചെയ്യലിനായി നിരവധിപേര്‍ക്ക് നോട്ടീസ് നല്‍കിയിട്ടുണ്ട്. അതിനാല്‍ ദിശ പൊലീസ് കസ്റ്റഡിയില്‍ തുടരേണ്ടത് ആവശ്യമാണ്. കേസിലെ പ്രതിയായ ശന്തനുവിന് നോട്ടീസ് നല്‍കിയിട്ടുണ്ടെന്നും ശന്തനുവിനൊപ്പം ചോദ്യം ചെയ്യാന്‍ ദിശ രവി ആവശ്യമാണെന്നും ഡല്‍ഹി പൊലീസ് കോടതിയില്‍ വാദിച്ചു.

ഈ കേസില്‍ കൂട്ടുപ്രതികളായ ശാന്താനു, നികിത ജേക്കബ് എന്നിവരോട് 22ന് ഹാജരാകാന്‍ ആവശ്യപ്പെട്ടിട്ടുണ്ട്. മൂന്നുപേരെയും ഒരുമിച്ചിരുത്തി ചോദ്യം ചെയ്യണം. അതുകൊണ്ട് റിമാന്‍ഡ് നീട്ടണമെന്നുമുള്ള പൊലീസിന്റെ വാദം കോടതി അംഗീകരിക്കുകയായിരുന്നു.

നേരത്തെ, തന്റെ വാട്‌സ്ആപ്പ് ചാറ്റുകള്‍ ചോര്‍ന്നെന്നും എഫ്ഐആറിലെ വിവരങ്ങള്‍ ചോര്‍ത്തപ്പെടുമെന്ന ആശങ്കയുണ്ടെന്നും ചൂണ്ടിക്കാട്ടി ദിശ കോടതിയില്‍ ഹര്‍ജി നല്‍കിയിരുന്നു. ട്രാന്‍സിറ്റ് റിമാന്‍ഡ് ഇല്ലാതെയാണ് തന്നെ അറസ്റ്റ് ചെയ്ത് കര്‍ണാടകയില്‍ നിന്നും ഡല്‍ഹിയില്‍ എത്തിച്ചത്. ഇത് ഭരണഘടന അവകാശങ്ങളുടെ ലംഘനമാണെന്നും ദിശ ഹര്‍ജിയില്‍ പറഞ്ഞു. ദിശ രവിയുടെ കേസുമായി ബന്ധപ്പെട്ട വിവരങ്ങള്‍ മാധ്യമങ്ങള്‍ക്ക് ചോര്‍ത്തിയിട്ടില്ലെന്ന് ഡല്‍ഹി പൊലീസ് കോടതിയെ അറിയിച്ചിരുന്നു.