ഫയലുകൾ നശിപ്പിച്ചത് മുഖ്യമന്ത്രിയെ രക്ഷിക്കാനെന്ന് രമേശ് ചെന്നിത്തല; ഗവര്‍ണര്‍ ആരിഫ് ഖാന് കത്തുനല്‍കി

സെക്രട്ടറിയേറ്റിലെ ഫയലുകൾ നശിപ്പിച്ചത് സ്വപ്നയേയും, ശിവശങ്കറേയും,മുഖ്യമന്ത്രിയേയും രക്ഷിക്കാനെന്ന് പ്രതിപക്ഷ നേതാവ് രമേശ് ചെന്നിത്തല. സ്വർണ്ണക്കടത്ത് കേസിലെ പ്രതികളേയും, മുഖ്യമന്ത്രിയേയും രക്ഷിക്കാനാണ് സെക്രട്ടറിയേറ്റിൽ തീപിടുത്തമുണ്ടാവുകയും ചീഫ് സെക്രട്ടറിയെ രംഗത്ത് ഇറക്കുകയും ചെയ്തത്.

ചീഫ് സെക്രട്ടറിയിൽ ജനങ്ങളുടെ വിശ്വാസം നഷ്ടപ്പെട്ടു. വിശ്വാസ് മേത്തയെ അവിശ്വാസ് മേത്തയായിട്ടാണ് ഇപ്പോൾ ജനങ്ങൾ കാണുന്നത്. പ്രോട്ടോക്കോൾ ഓഫീസിൽ തീ പിടിക്കാൻ ഒരു സാഹചര്യവുമില്ലന്നും ചെന്നിത്തല ആരോപിച്ചു.

സെക്രട്ടേറിയറ്റിലെ പൊതുഭരണവകുപ്പിലെ പ്രോട്ടോക്കോള്‍ ഓഫീസില്‍ ഉണ്ടായ തീപിടിത്തത്തില്‍ ചീഫ് സെക്രട്ടറിയെ വിളിച്ചു വരുത്തി വിശദീകരണം തേടണമെന്ന് പ്രതിപക്ഷ നേതാവ് രമേശ് ചെന്നിത്തല. ഇക്കാര്യം ചൂണ്ടിക്കാട്ടി പ്രതിപക്ഷനേതാവ് ഗവര്‍ണര്‍ ആരിഫ് ഖാന് കത്തുനല്‍കി.

തീപിടിത്തം യാദൃശ്ചികമല്ലെന്ന് അദ്ദേഹം ആരോപിച്ചു. സ്വര്‍ണക്കടത്തു കേസിലെ തളിവുകള്‍ നശിപ്പിക്കുകയാണ് ലക്ഷ്യം. പ്രോട്ടോക്കോള്‍ ഓഫിസില്‍ തിപിടിക്കാനുള്ള യാതൊരു സാഹചര്യവുമില്ല. സെന്‍ട്രലൈസ്ഡ് എ.സിയുള്ള സ്ഥലത്ത് ഒരു ഫാന്‍ കെട്ടിത്തൂക്കിയിരിക്കുന്നു. അവിടെ ഫാന്‍ ആവശ്യമില്ല. ആരോ കെട്ടിത്തൂക്കിയ പോലെയുണ്ടെന്നും അദ്ദേഹം ചൂണ്ടിക്കാട്ടി.
ചീഫ് സെക്രട്ടറി വിശ്വാസ് മേത്ത അവിശ്വാസ് മേത്തയായെന്ന് അദ്ദേഹം പരിഹസിച്ചു.

പൊതുഭരണവകുപ്പിലെ പ്രോട്ടോക്കോള്‍ വിഭാഗത്തിലെ മൂന്ന് സെക്ഷനുകളിലെ ബാക്ക് അപ്പ് ഇല്ലാത്ത പേപ്പര്‍ ഫയലുകള്‍ വീണ്ടെടുക്കാനാവാത്ത വിധത്തില്‍ നശിച്ചുപോയെന്നാണ് വിവരം. പൊളിറ്റിക്കല്‍ 2 എ, 2 ബി, 5 എന്നീ സെക്ഷനുകളിലെ ഫയലുകളാണ് നശിച്ചത്. വി.വി.ഐ.പി, വി.ഐ.പി സന്ദര്‍ശന ഫയലുകള്‍ ഈ സെക്ഷനുകളിലാണ്. സെക്ഷന്‍ 5ല്‍ മന്ത്രിമാരുടെ വിദേശയാത്ര സംബന്ധിച്ച ഫയലുകളാണ്. 2 ബിയില്‍ മന്ത്രിമാരുടെയടക്കം വിരുന്നുകള്‍, ഗസ്റ്റ് ഹൗസുകള്‍ ആര്‍ക്കൊക്കെ അനുവദിച്ചു എന്നിവയുടെ ഫയലുകളും. ജോയിന്റ് പ്രോട്ടോക്കോള്‍ ഓഫിസര്‍ക്ക് കൊവിഡ് സ്ഥിരീകരിച്ചതിനെത്തുടര്‍ന്ന് ഏതാനും ദിവസമായി ഈ സെക്ഷനുകള്‍ അടച്ചിട്ടിരിക്കുകയായിരുന്നു.